स्वप्नातून ध्येय ठरतात आणि ध्येयातूनच पुढची दिशा सापडते!

पीएमपीएमएलचे अध्यक्ष व व्यवस्थापकीय संचालक तुकाराम मुंढे यांचे प्रतिपादन

पिंपरी-चिंचवड : उच्च ध्येयाचे स्वप्न साकार होण्यासाठी मनातील ज्योत पेटावी लागते. परिस्थितीवर स्वार झाले तरच यश मिळते. पुढे येण्याची, काही तरी बनण्याची महत्त्वाकांक्षा ठेवा. समाजाचे आपण काहीतरी देणे लागतो; ही भावना जोपासा. एकाच वेळी अनेक गोष्टींवर लक्ष केंद्रित करण्यापेक्षा एकच ध्येय ठरवा आणि त्यात पूर्णत्त्वाने स्वत:ला झोकून द्या. सकारात्मक विचार करा. प्रामाणिक प्रयत्न करा. स्वप्नातून ध्येय ठरतात आणि ध्येयातूनच दिशा सापडत असते, असे प्रतिपादन पुणे महानगर परिवहन महामंडळ लिमिटेडचे (पीएमपीएमएल) अध्यक्ष व व्यवस्थापकीय संचालक तुकाराम मुंढे यांनी केले. दिशा सोशल फाउंडेशनतर्फे चिंचवड येथील प्रा. रामकृष्ण मोरे प्रेक्षागृहात ‘संवाद तरुणाईशी’ उपक्रमांतर्गत ‘स्पर्धा परीक्षेची पूर्व तयारी व प्रशासनातील संधी’ या विषयावर मार्गदर्शन शिबिर आयोजित केले होते. यावेळी विद्यार्थ्यांना मार्गदर्शन करताना ते बोलत होते.

यांची होती उपस्थिती
कार्यक्रमाच्या अध्यक्षस्थानी उपजिल्हाधिकारी अशोक मुंढे होते. याप्रसंगी संस्थेचे अध्यक्ष गोरख भालेकर, कार्याध्यक्ष सचिन साठे, समन्वयक नाना शिवले, काँग्रेसचे शहराध्यक्ष सचिन साठे, महिला काँग्रेसच्या शहराध्यक्षा गिरीजा कुदळे, भाजपाचे माजी शहराध्यक्ष सदाशिव खाडे आदी मान्यवर उपस्थित होते.

ध्येयाकडे आत्मविश्‍वासाने वाटचाल करा
तुकाराम मुंढे यांनी रोखठोक शैलीत करिअर मार्गदर्शन, करिअर समुपदेशन व स्पर्धा परीक्षेच्या अभ्यासाचे धडे विद्यार्थ्यांना दिले. घोकंपट्टी न करता नियोजनपूर्वक सखोल अभ्यास करा. ध्येय निश्चित करून त्यादृष्टीने आत्मविश्वासाने वाटचाल करा. विविध विषयांचा अभ्यास करून त्या अनुषंगाने पुस्तके वाचा. परीक्षेची भीती बाळगू नका. आत्मविश्वासाने सामोरे जा. कॉपी करणे आणि अंदाजे लिहिणे टाळा. तयारी आणि अचुकतेला परीक्षेत अत्यंत महत्त्व असते, असे मुंढे यांनी सांगितले.

संयोजनात यांचा हातभार
कार्यक्रमाचे प्रास्ताविक नाना शिवले यांनी केले. कार्यक्रमाचे सूत्रसंचालन डॉ. अविनाश वाळुंज यांनी केले. सचिन साठे यांनी आभार मानले. गुरूदास भोंडवे, विजय कांबळे, राजेंद्र करपे, संतोष बाबर, अविनाश ववले, श्याम अहिरराव, किशोर जवळकर, अतुल शिंदे, मनोज टंकसाळे, बाजीराव लोखंडे, नंदू कांबळे, रोहित खर्गे, राजेश सावंत, महेंद्र चिंचवडे, प्रवीण कुदळे, गणेश लंगोटे यांनी कार्यक्रमासाठी विशेष परिश्रम घेतले.