स्वरमैफलीतून उलगडले शास्त्रीय संगीताचे पैलू

पुणे । रागातील बंदिशींच्या माध्यमातून सुमधूर गायकीची आणि आलाप-तानांमधील अनोख्या जुगलबंदीची रसिकांनी अनुभूती घेतली. पं. राजन-साजन मिश्रा यांनी सादर केलेल्या स्वरमैफलीतून रसिकांसमोर शास्त्रीय संगीतातील विविध पैलू रसिकांसमोर उलगडले. श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळच्यावतीने ट्रस्टच्या शतकोत्तर रौप्यमहोत्सवी (125) वर्षानिमित्त गणेश कला क्रीडा मंच येथे सांस्कृतिक महोत्सव सुरू आहे. यामध्ये शास्त्रीय गायन जुगलबंदीचा कार्यक्रम झाला.

या मैफलीची सुरुवात रामदासी-मल्हार या रागाने झाली. या रागातील विलंबित एक तालातील सकल बलहु लाए… मध्यलय तीन तालातील घन आये घनश्याम न आये… या बंदिशींनी रसिकांची मने जिंकली. सूरांची देवी असलेल्या मातंगी मातेचे वर्णन असलेल्या जय जय जय मातंगी माता… या बंदिशीने रसिक मंत्रमुग्ध झाले. धन्य भाग सेवा का अवसर पाया… या भजनाने मैफलीची सांगता झाली. अरविंद थत्ते (हार्मोनिअम), अरविंदकुमार आझाद (तबला), निकीता दरेकर (तानपुरा) यांनी साथसंगत केली.