स्वाइन फ्ल्यू समुपदेशन केंद्रांची स्थापना

पुणे । जिल्हा परिषदेच्या आरोग्य विभागाच्यावतीने ९६ प्राथमिक आरोग्य केंद्रात स्वाइन फ्ल्यू समुपदेशन केंद्र उभारण्यात आले आहेत. स्वाइन फ्ल्यूबद्दल लोकांना समुपदेशन देण्यात येत असून समुपदेशन केंद्रामध्ये ताप सदृश्य रुग्ण आढळल्यास त्याच्या आजाराच्या पुढील तपासण्यासाठी रक्ताचे नमुने आणि इतर चाचण्या केल्या जात आहेत. व उपचार करण्यात येत आहेत, अशी माहिती जिल्हा आरोग्यधिकारी डॉ. दिलीप माने यांनी दिली.

ग्रामीण भागात नागरिकांना ताप, सर्दी, खोकला, घसादुखी लक्षणे आढळून आल्यास त्वरित नजिकच्या ग्रामीण रुग्णालय अथवा प्राथमिक आरोग्य केंद्रात तपासनी करून घेण्याचे आवाहन आरोग्य विभागाने केले आहे. लहान मुले, वृद्ध व्यक्ती, गरोदर स्त्रिया, अस्थमा तसेच मधुमेह आणि रक्तदाब असणार्‍या व्यक्तींनी अंगावर दुखणे न काढता त्वरित जवळच्या दवाखान्यात उपचार घ्यावेत. स्वाइन फ्ल्यूची लक्षणे आढळल्यास त्वरित जवळच्या ग्रामीण रुग्णालय किंवा प्राथमिक आरोग्य केंद्रात जाण्याचे आवाहन आरोग्य विभागाने केले आहे.

रुग्णांची वेगळी यादी तयार करणार
स्वाइन फ्ल्यू, चिकुनगुनिया, डेंगी आजारावर नियत्रंण ठेवण्यासाठी प्राथमिक आरोग्य केंद्र आणि उपकेंद्रात जनजागृती करून प्राथमिक उपचार करण्यात येत आहे. तसेच स्वाइन फ्ल्यू आजाराबद्दल जिल्ह्यातील ९६ प्राथमिक आरोग्य केंद्रात समुपदेशन केंद्र उभारण्यात आले आहे. त्याद्वारे रुग्णांची वेगळी यादी तयार करून उपचार केले जाणार आहेत.  – प्रवीण माने, बांधकाम व आरोग्य समिती सभापती