स्वाईन फ्लूचा चाकणमध्ये दुसरा बळी

चाकण : चाकण व परिसरात स्वाईन फ्लूने चांगलेच डोके वर काढले असून, मागील आठवड्यात चाकण येथील एका विवाहितेच्या मृत्यू नंतर आता कडाचीवाडी येथील पस्तीस वर्षीय विवाहितेचा या गंभीर आजाराने बळी गेला आहे. चाकण भागातील स्वाईन फ्लूचा हा दुसरा बळी असल्याने येथील नागरिकांमध्ये भीतीचे वातावरण निर्माण झाले आहे. शर्मिला एकनाथ कड (वय 35, रा. कडाचीवाडी) असे स्वाईन फ्लूने मृत्यू झालेल्या विवाहितेचे नाव आहे. प्रदीप कड (वय 26, रा. कडाचीवाडी) यांनी याप्रकरणी चाकण पोलीस ठाण्यात फिर्याद दिली आहे.

गेल्याच आठवड्यात अनिता सिंग या विवाहितेचा या गंभीर आजाराने मृत्यू झाला होता. दरम्यान शर्मिला कड यांना स्वाईन फ्लू झाल्याचा पॉझीटीव्ह आहवाल प्राप्त झाला आहे. कड यांना सर्दी, खोकला, घशात खवखव होणे, श्‍वासोच्छवास घेण्यास त्रास होत असल्यामुळे त्यांना उपचारासाठी येथील एका खाजगी रुग्णालयात दाखल करण्यात आले होते. उपचार सुरु असताना त्यांचा अखेर मृत्यू झाला. चाकण ग्रामीण रुग्णालयात शवविच्छेदन व उत्तरीय तपासणी नंतर मृतदेह नातेवाईकांच्या ताब्यात देण्यात आला.

पावसाने पाठ फिरवली असली तरी, थंड हवामानामुळे चाकण परिसरात आता डेंग्यूसह साथीचे आजार आणि स्वाइन फ्लूनेही थैमान घातले आहे. बदलत्या हवामानामुळे शहरात स्वाइन फ्लूचा प्रादुर्भाव मोठ्या प्रमाणावर वाढला असून, सप्टेंबर महिन्यातील दहा-बारा दिवसांत दोन जणांचा स्वाइन फ्लूने बळी घेतला आहे. पंचक्रोशीतील आणखी काही जणांना स्वाइन फ्लूची लागण झाल्याची शक्यता आहे. गणेशोत्सवासाठी भाविक मोठ्या प्रमाणात घराबाहेर पडतात. गर्दीमुळे स्वाइन फ्लूच्या रुग्णांची संख्या वाढण्याची शक्यता असल्याने वैद्यकीय विभागाच्यावतीने जनजागृती मोहीम हाती घेण्याची आहे.