स्व. आबांच्या कन्या अ‍ॅड. स्मिता होणार दौंडच्या सुनबाई!
दौंड : राज्याचे माजी गृहमंत्री व राष्ट्रवादी काँग्रेसचे दिवगंत नेते आर. आर. पाटील उर्फ आबा यांची राजकीय वारसदार असलेल्या त्यांच्या कन्या अ‍ॅड. स्मिता पाटील या दौंड तालुक्याच्या सूनबाई होणार आहेत. पुणे जिल्हा सहकारी बँकेचे अध्यक्ष व माजी आमदार रमेश थोरात यांचे पुतणे आनंद थोरात यांच्याशी स्मिता यांचा विवाह होणार आहे. मे 2018 मध्ये हे जोडपे विवाहबद्ध होणार असून, हे लग्न जमविण्यासाठी राष्ट्रवादी काँग्रेसचे अध्यक्ष व ज्येष्ठ नेते शरद पवार यांनीच पुढाकार घेतला होता. स्मिता या कायद्याच्या पदवीधर असून, ज्येष्ठ विधिज्ज्ञ उज्वल निकम यांचेही त्यांना मार्गदर्शन लाभलेले आहे. सद्या त्या राष्ट्रवादी युवती काँग्रेसच्या प्रदेशाध्यक्षा आहेत.
थोरात-पाटील होणार व्याही-व्याही
पुणे जिल्हा सहकारी बँकेचे अध्यक्ष व माजी आमदार रमेश थोरात यांचे थोरले बंधू प्रभाकर थोरात यांचा मुलगा आनंद आणि अ‍ॅड. स्मिता पाटील यांचे लग्न ठरले आहे. शरद पवारांच्या पुढाकारानेच ही सोयरीक जमविल्याच्या बातमीला थोरात यांनी दुजोरा दिला. स्व. आबांचे जावाई झालेले आनंद थोरात यांनी परदेशात शिक्षण घेतले असून, सध्या ते पुण्यात व्यवसाय करतात तर स्मिता या कायद्याच्या पदवीधर असून, त्यांच्याकडे राष्ट्रवादी युवती काँग्रेसची जबाबदारी आहे. स्व. आबा हे शरद पवारांचे सर्वाधिक विश्वासू सहकारी होते. आबांच्या निधनाने पवारांना अतिव दुःख झाले होते.
मे महिन्यात पुण्यात उडणार लग्नाचा बार
आर. आर. पाटील व त्यांचे कुटुंबीय हे सामान्य घरातून पुढे आले होते. आजही त्यांचे सर्व कुटुंबीय सामान्य व साधे राहतात, वागतात. आबांचे घराणे तालेवार नव्हते. त्यामुळे आबांच्या निधनानंतर पवारांनी त्यांच्या कुटुंबांकडे वैयक्तिक लक्ष घालणार असल्याचे म्हटले होते. आबांना दोन मुली व मुलगा रोहित आहे. मात्र, हे सर्व जण अद्याप महाविद्यालयीन व शालेय शिक्षण घेत होते. त्यामुळे आबांच्या माघारी शरद पवारांनी स्मिताच्या लग्नात लक्ष घातले. दौंड जिल्ह्यातील राष्ट्रवादीचे नेते व माजी आमदार रमेश थोरात यांच्याशी पवारांचा राजकारणाशिवाय स्नेह आहे. त्यामुळे थोरातांच्या पुतण्याला स्मिताचे स्थळ पवारांनी सूचवले. थोरात कुटुंबीयांकडून पसंती झाल्यानंतर हे लग्न जमल्याची माहिती मिळाली. येत्या मे महिन्यात स्मिता व आनंद यांच्या लग्नाचा बार पुण्यात उडणार असल्याचे कळते. आबांचे सर्वपक्षीय संबंध पाहाता, या लग्नाला सर्वपक्षीय नेत्यांची राजकीय मांदियाळीही पुण्यात दिसण्याची शक्यता आहे.