‘हडरपसरवासियांची इडापिडा टळू दे’

हडपसर । हडपसरमधील महापालिकेच्या नियोजीत कचरा डेपोला विरोध करण्यासाठी जागरण-गोंधळ आंदोलन करण्यात आले. वाघ्या-मुरळींनी नृत्याविष्कारातून खंडोबाची आराधना केली. ’हडपसरवासियांची इडापिडा टळून जाऊ दे’ यासाठी खंडोबा देवाला साकडे घातले. बहिरे व आंधळे झालेले पालिका प्रशासन व महापौर आणि पालकमंत्र्यांना जाग आणण्यासाठी हा जागरण गोंधळ घालण्यात आला. कार्यकर्त्यांनी दिवटया नाचवल्या. शुक्रवारी रात्री हडपसर वेशीसमोरील उड्डाणपुलाखाली हे आंदोलन झाले.

कचरा प्रकल्प होऊ न देण्याचा निर्धार
हडपसर-रामटेकडी कचरा प्रकल्प हटविण्यासाठी राष्ट्रवादी काँगेस पक्षाच्या हडपसर विधानसभा मतदार संघाच्या वतीने हे अनोख्या प्रकारचे जागरण-गोंधळ आंदोलन करण्यात आले. कार्यकर्त्यांनी व नागरिकांनी पेटून उठत आता थांबायचे नाही, असा संकल्प केला व कोणत्याही परिस्थितीत या भागात नवीन कचरा प्रकल्प होऊ द्यावयाचा नाही असा ठाम निर्धार केला. यावेळी सत्ताधार्‍यांविरोधात घोषणाबाजी करून निषेध करण्यात आला. विरोधी पक्ष नेते चेतन तुपे, हडपसर प्रभाग समिती अध्यक्ष योगेश ससाणे, नगरसेविका वैशाली बनकर, अशोक कांबळे, रूक्साना इनामदार, सुनील बनकर, सागर राजेभोसले, डॉ. शंतनू जगदाळे आदींसह नागरिक व राष्ट्रवादीचे कार्यकर्ते मोठ्या संख्येने याप्रसंगी उपस्थित होते.

जोडे मारो आंदोलन
महापौर, आयुक्त, पालकमंत्री आणि मुख्यमंत्र्याना गेली चार महिने लेखी, तोंडी विनंती करून आणि आंदोलने करून देखील आंदोलकांचा आवाज ऐकू येत नाही. त्यामुळे त्यांची कानउघडणी करण्यासाठी आम्ही सलग आठ दिवस आंदोलन सुरू केले आहे. यामध्ये भोंगा वाजवणे, तोंडावर काळी पट्टी बांधणे, भजन, थाळी वादन, जागरण-गोंधळ ही आंदोलने झाली आहेत. पुढील दोन दिवसात कचरा तुला व जोडे मारो आंदोलने करण्यात येणार आहे. हडपसरची कचरा पेटी होऊ देणार नाही, यासाठी वाटेल ती किंमत मोजू ही प्रत्येक नागरिकाची भूमीका आहे.
– चेतन तुपे, विरोधी पक्षनेते, मनपा

…तर कचर्‍याच्या गाड्या जाळणार
हडपसर औद्योगिक वसाहतीत सुरू असलेल्या नवीन कचरा प्रकल्पाचे काम त्वरित थांबवावे. अन्यथा येथे रोकेम व अजिंक्य हे दोन सुरू असलेले प्रकल्प बंद पाडू. सलग 8 दिवस सदनशीर मार्गाने आंदोलन केल्यानंतरही जनतेचा तीव्र विरोध सत्ताधारी जुमानत नसतील तर, घनकचरा विभागाच्या गाड्या अडवणार, फोडणार आणि जाळणार.
– योगेश ससाणे
प्रभाग समिती अध्यक्ष, हडपसर