हफ्तेखोर पोलिसांमुळे मुक्ताईनगरात गुंडगिरी वाढली

मुक्ताईनगर : तरुणीचा फोटो सोशल मिडीयात व्हायरल केल्यानंतर नगरसेविका पूत्राला मारहाण झाल्यानंतर दोषींवर कारवाई करण्यासाठी जिल्हा बँकेच्या माजी अध्यक्षा अ‍ॅड.रोहिणी खडसे यांनी शुक्रवारी रात्री उशिरापर्यंत मुक्ताईनगर पोलिस ठाण्याबाहेर पदाधिकार्‍यांसह ठिय्या मांडला होता. रात्री उशिरा छोटू भोई यांच्यासह अन्य तिघा अनोळखींविरोधात मुक्ताईनगर पोलिसात गुन्हा दाखल करण्यात आल्यानंतर आंदोलक शांत झाले. दरम्यान नगरसेविका पूत्रास झालेल्या मारहाण प्रकरणी राष्ट्रवादी काँग्रेसचे ज्येष्ठ नेते आमदार एकनाथराव खडसे यांनी पोलिसांवर गंभीर आरोप करीत त्यांच्यावर निशाणा साधला आहे. हप्तेखोर पोलिसांमुळे शहरात गुन्हेगारी वाढली असून 307 च्या गुन्ह्यातील गुन्हेगार मोकाट फिरत असून अवैध धंदेदेखील वाढले असून या बाबत खंडपीठात याचिका दाखल करू, असा इशारा खडसे यांनी दिला आहे.

पोलिसांच्या हप्तेखोरीमुळे गुन्हेगारी वाढली
मुक्ताईनगरात पोलिसांमुळे गुंडगिरी वाढली असून लाचार आणि हप्तेखोर पोलिसांमुळे अशा प्रकारच्या घटना घडत आहे, या गुंडांचे अवैध धंदे असल्याने आणि ते पोलिसांना हप्ते देत असल्याने या गुंडावर पोलिस कारवाई करत नसल्याचा आरोप खडसे यांनी केला.

नगराध्यक्षपद निवडणूक स्थगितीच्या रागातून कार्यकर्त्याला मारहाण
आमदार एकनाथराव खडसे म्हणाले की, शुक्रवारी मुक्ताईनगरात नगराध्यक्षपदाच्या निवडणुकीला स्थगिती मिळाली. त्याच्याच रागातून आज माझ्या कार्यकर्त्याला महिलेसह जमावाने मारहाण केली. मुक्ताईनगरात संबंधित गुंडांकडून नेहमी अशाच प्रकारच्या घटना घडत असून या गुंडांवर कठोर कारवाईसाठी लवकरच औरंगाबाद खंडपीठात दावा दाखल करणार असल्याचेही यावेळी खडसे यांनी सांगितले.

दोषींवर कारवाई करणार : जिल्हा पोलिस अधीक्षक
दरम्यान, मुक्ताईनगर येथील नगरसेविका पुत्रास मारहाण केल्या प्रकरणी पोलिस या घटनेची चौकशी करीत आहेत, चौकशी अंती योग्य ती कायदेशीर कारवाई करण्यात येणार असल्याची माहिती जळगावचे पोलिस अधीक्षक डॉ.प्रवीण मुंढे यांनी दिली.