हरतालिकेसाठी तयारी करताना विजेच्या धक्क्याने तरुणीचा मृत्यू

नंदगाव येथील घटना ; कुटुंबिय गेले होते शेतात

जळगाव : हरतालिका असल्याने अंघोळीनंतर पूजेसाठी तयारी करत असतांना विजेच्या धक्क्याने ममता बलदेव पाटील (19 रा. नंदगाव, ता.जळगाव ) या तरुणीचा मृत्यू झाल्याची घटना रविवारी सकाळी 10 वाजता येथे घडली. ममता घरी एकटीच होती, शेजारील चुलत बहिण बोलावण्यास आली असता तिला घरात ममता पडलेली दिसली यानंतर प्रकार उघडकीस आला.

सूत्रांनी दिलेल्या माहितीनुसार, बलदेव केशव पाटील हे पत्नी वंदना, मुलगा सनीराज व दुसरा मुलगा राज असे सर्व जर रविवारी सकाळीच शेतात गेले होते. शेजारीच राहणारी चुलत बहीण धनश्री ही हरतालिकेच्या पूजेसाठी ममता हिला बोलवायला घरी गेली असता ममताला विजेचा धक्का बसल्याने ती जमिनीवर कोसळली होती. धनश्रीने ही माहिती कुटुंबियांनी दिली. यानंतर तातडीने जिल्हा रुग्णालयात हलविण्यात आले. याठिकाणी वैद्यकिय अधिकार्‍यांनी ममताला मृत घोषीत केले. शवविच्छेदन झाल्यानंतर मृतदेह नातेवाईकांच्या ताब्यात देण्यात आला.

आयटीआयची विद्यार्थिनी
ममता ही शासकीय आयटीआयची विद्यार्थिनी होती. मोठा भाऊ राज देखील खासगी आयटीआयला शिक्षण घेत आहे. आई, वडील शेती करतात. ममता लाडाची मुलगी होती. आमची माई… आमची माई… असे म्हणत आई, वडीलांनी जिल्हा रुग्णालयात प्रचंड आक्रोश केला. याप्रकरणी तालुका पोलिसात अकस्मात मृत्यूची नोंद करण्यात आली आहे.