हरिद्वारला भाविकांचे हेलिकॉप्टर कोसळले

हरिद्वार । बद्रीनाथहून हरिद्वारच्या दिशेने निघालेल्या हेलिकॉप्टरला शनिवारी सकाळी अपघात झाला. या अपघातात एका इंजिनिअरचा जागीच मृत्यू झाला. तर, दोन पायलट गंभीर जखमी झाले. हेलिकॉप्टरमधील भाविक सुखरूप असल्याची माहिती आहे. वरिष्ठ पोलिस अधिकाऱी घटनास्थीळी पोहोचले असून, मदत आणि बचावकार्यास तातडीने सुरूवात करण्यात आली आहे. अपघातग्रस्त हेलिकॉप्टर मुंबईतील क्रिस्टल कंपनीचे असल्याची प्राथमिक माहिती आहे.

अपघात घडलेल्या हेलिकॉप्टरने शनिवारी सकाळी सव्वासातच्या दरम्यान बद्रीनाथहून हरिद्वारच्या दिशेने उड्डाण घेतले. मात्र, नेहमिप्रमाणे उड्डाण घेतलेल्या या हेलिकॉप्टरला काही वेळातच अपघात झाला. प्राप्त माहितीनुसार ज्या ठिकाणी हेलिकॉप्टर कोसळले त्या ठिकाणी विजेच्या ताराही दिसून आल्या आहेत. त्यामुळे विजेच्या तारांशी जर हेलिकॉप्टरचा संपर्क आला असता तर, मोठा अनर्थ घडला असता, अशी भीती व्यक्त करण्यात येत आहे.

भाविक मात्र सुखरूप
पोलिस अधीक्षक तृप्ती भट्ट यांनी दिलेल्या माहितीनुसार, हेलिकॉप्टरमधील पाच भाविक सुखरुप आहेत. मात्र, विक्रम लांबा नावाचे इंजिनीअर यांचा या दुर्घटनेत मृत्यू झाला. हेलिकॉप्टरच्या बाहेर पडताना ब्लेड लागल्याने लांबा यांचा मृत्यू झाला. या घटनेची माहिती लांबा यांच्या कुटुंबीयांना देण्यात आली आहे, असेही त्यांनी सांगितले.