हल्लेखोरांना पोलिस कोठडी

अहमदनगर : कोपर्डी अत्याचार प्रकरणातील नराधमांवर शनिवारी न्यायालयाच्या आवारात हल्ला करण्याचा प्रयत्न करणार्‍या चार आरोपींना सहा दिवसांची पोलिस कोठडी देण्यात आली. या सर्व आरोपींना रविवारी प्रथमवर्ग न्यायदंडाधिकारी न्यायालयासमोर हजर करण्यात आले होते. शनिवारी आरोपी जितेंद्र शिंदे, संतोष भवाळ आणि नितीन भैलुमे या तिघांना सबजेलमध्ये नेण्यासाठी पोलिस आपल्या गाडीकडे घेऊन जात होते. यावेळी अमोल सुखदेव खुणे, बाबुराव वामन वाळेकर, राजेंद्र बाळासाहेब जर्‍हाड व गणेश परमेश्‍वर खुणे या चौघांनी आपल्या हातातील सत्तूरसारख्या लोखंडी हत्याराने आरोपींना मारण्याचा प्रयत्न केला होता.

पोलिसांना करायचा सखोल तपास
पोलिसांनी प्रसंगावधान राखत चारही हल्लेखोरांना जागीच जेरबंद करून भिंगार कॅम्प पोलिसांच्या हवाली केले होते. पोलिसांनी हल्लेखोरांच्या विरोधात आरोपींना ठार मारण्याचा प्रयत्न केल्याप्रकरणी गुन्हा दाखल केला होता. रविवारी चारही हल्लेखोरांना भिंगार पोलिस स्टेशनचे सहायक पोलिस निरीक्षक कैलास देशमाने यांनी न्यायालयात हजर केले होते. आरोपी व हल्लेखोर यांचे आपसात वैमनस्य आहे का, हल्ल्यामागे कोणती संघटना आहे का, हल्लेखोरांना न्यायालयात येण्यासाठी कोणीकोणी सहकार्य केले, त्यांनी हत्यारे कोठून आणली, यासर्वांची चौकशी करण्यासाठी हल्लेखोरांना पोलिस कोठडी देण्यात यावी, असे देशमाने यांनी न्यायालयात सांगितले. तर, सरकारी वकील अ‍ॅड. सीमा देशपांडे यांनीही आरोपींना अधिक तपासासाठी पोलिस कोठडी देण्याची विनंती केली. आरोपींच्यावतीने अ‍ॅड. वाजिद खान (बिडकर), अ‍ॅड. गणेश म्हस्के, अ‍ॅड. संजय वाल्हेकर यांनी बाजू मांडली. दोन्ही बाजू ऐकूण घेतल्यानंतर न्यायालयाने चारही हल्लेखोरांना सहा दिवसांची पोलिस कोठडी दिली.