हिंगोण्यानजीक दुचाकी आदळून दोघे ठार

फैजपूर : भरधाव दुचाकी एकमेकांवर आदळून झालेल्या अपघातात दोघाही दुचाकीस्वारांचा जागीच मृत्यू झाला. सोमवारी सकाळी नऊ ते साडेनऊ वाजेच्या सुमारास हिंगोणा गावाजवळ हा अपघात झाला. या अपघातात दुचाकीस्वार अल्लाउद्दीन मुबारक तडवी (फैजपूर) व पंखा पवार (हलखेडा, ता.मुक्ताईनगर) यांचा मृत्यू झाला. या प्रकरणी फैजपूर पोलिसात मयतांविरुद्ध मोटार अपघाताचा गुन्हा दाखल करण्यात आला.

भरधाव दुचाकी एकमेकांवर आदळल्या
सूत्रांच्या माहितीनुसार पंखा पवार हे प्लॅटीना (एम.एच.19 ई.ई.9787) वरून हितेश दारासिंग पवार (हलखेडा) यांच्यासोबत भरधाव वेगाने जात असताना समोरून भरधाव वेगाने येणारी विना क्रमांकाच्या हिरो होंडावरून अल्लाउद्दीन मुबारक तडवी (फैजपूर) व नबाब मुराद तडवी (फैजपूर) व शरीफ लतीफ तडवी (फैजपूर) हे ट्रीपल सीट जात असताना दोन्ही भरधाव दुचाकी एकमेकांवर आदळल्याने अलाउद्दीन तडवी व पंखा पवार यांच्या डोक्याला मार लागल्याने ते जागीच ठार झाले. अपघात प्रकरणी हिंगोणा पोलिस पाटील दिनेश बाविस्कर यांनी फैजपूर पोलिसात फिर्याद दिल्यावरून दोघाही मयत दुचाकीस्वारांविरुद्ध मोटार अपघाताचा गुन्हा दाखल करण्यात आला. तपास उपनिरीक्षक जिजाबराव पाटील करीत आहेत.