हिंजवडी – शिवाजीनगर मेट्रो प्रकल्पाला मंजुरी
मुंबई:– पुण्यातील हिंजवडी ते शिवाजीनगर मेट्रो रेल्वे प्रकल्पाची सार्वजनिक खासगी सहभागाने संकल्पन करा, बांधा, आर्थिक पुरवठा करा, वापरा व हस्तांतरित करा (DBFOT) या तत्त्वावर पुणे महानगर प्रदेश विकास प्राधिकरणामार्फत (पीएमआरडीए) अंमलबजावणी करण्यास आज झालेल्या मंत्रिमंडळाच्या बैठकीत मंजुरी देण्यात आली. या मेट्रो मार्गाची लांबी 23.3 कि.मी. राहणार असून या प्रकल्पाचा एकूण खर्च 8 हजार 313 कोटी रुपये आहे.
याबाबत मंत्रालयात आयोजित पत्रपरिषदेत बोलताना पुण्याचे पालकमंत्री गिरीश बापट यांनी सांगितले की, बैठकीत शिवाजीनगर ते हिंजवडी मेट्रोला मंजुरी मिळाली असून 23.5 किमीचा हा मार्ग होणार आहे. यासाठी 8, 313 कोटी रुपये खर्च लागणार असून 1,137 कोटी केंद्राकडून अपेक्षित आहेत तर राज्य सरकारकडून 1,812 कोटी अपेक्षित आहेत. तर उरलेले पैसे खाजगी गुंतवणूकदारांकडूनघेतले जाणार आहेत. पीपीपी तत्वावर प्रकल्प उभारणार असल्याचे बापट यांनी सांगितले.
बापट यांनी सांगितले की, 2022 पर्यंत या प्रकल्पाचे काम पूर्ण होणार असून यामुळे औद्योगिक क्षेत्रात अडीच लाखाच्या वर लोकांची सोय होणार आहे. यासाठी दिल्ली मेट्रोकडून प्लन तयार केला असून यामध्ये 23 स्थानके यामध्ये होणार असल्याचे बापट म्हणाले. 48 महिने प्रकल्पाचा कालावधी असून ही मेट्रो शिवाजीनगर, औंध, बाणेर, हायवे, बालेवाडी वाकडमार्गे हिंजवडीला जाणार आहे. पहिल्यांदा दर पाच मिनिटांनी एक गाडी सुटेल तर 5 वर्षानंतर पावणेतीन मिनिटाला गाडी सुटणार असल्याचेही बापट यांनी सांगितले.
या प्रकल्पासाठी खाजगी 25 हेक्टर जमीन डेपोकरिता लागणार आहे. तर एमआयडीसी कडून 18 ते 20 हेक्टर जमीन लागणार असल्याची माहिती बापट यांनी दिली. महाळुंगे गावात टिपी स्कीम वरदान ठरणार असून शेतकऱ्यांना त्यांचा पूर्ण एरिया डेव्हलप करून मिळणार आहे. 50 टक्के जागा देणाऱ्यांना 100 टक्के एफएसआय मिळणार असल्याचे बापट म्हणाले. यासाठी शेतकऱ्यांना एकही पैसा न देता रेसिडेंशियल झोन करून मिळणार असल्याचेही बापट यांनी सांगितले. यासाठी कुणाचाही विरोध नसल्याचे देखील ते म्हणाले. पुणे- पिंपरी चिंचवड शहरातील इतर मेट्रोचे काम महाराष्ट्र मेट्रो रेल कार्पोरेशन (महा-मेट्रो) मार्फत करण्यात येत असल्याने या सर्व प्रकल्पांमध्ये एकवाक्यता राखण्यासाठी सदर प्रकल्पाची अंमलबजावणी महा-मेट्रोचा वेळो-वेळी सल्ला घेऊन करावयाचे आहे असेही बापट म्हणाले.