हिजबुलच्या दहशतवाद्याला अटक

श्रीनगर : काश्मीर खोर्‍यात सुरक्षा दलांनी बुधवारी हिजबुल मुजाहिद्दीनच्या दहशतवाद्याला ताब्यात घेतले. अनंतनाग येथील बीजबहाडा रेल्वे स्थानक परिसरात ही कारवाई करण्यात आली. आदिल अहमद भट असे या दहशतवाद्याचे नाव असून, त्याच्यावर तीन लाख रुपयांचे बक्षीस होते. एका सहकार्‍याची भेट घेऊन तो निघाल्याची माहिती पोलिसांना मिळाली होती. त्यानुसार, लष्कर, पोलिस आणि सीआरपीएफच्या एका संयुक्त दलाने त्याला सापळा रचून पकडले.

अनंतनाग जिल्ह्यात जबलीपोला बीजबेहाडा या भागात राहणारा दहशतवादी आदिल हा पोलिसांना विविध गुन्ह्यांमध्ये हवा होता. पोलिस चौक्यांवर हल्ल्यांप्रकरणी तसेच पंचायत सदस्य आणि पोलिसांना मारहाणीचे विविध गुन्हे त्याच्यावर दाखल आहेत. या प्रकरणी त्याची अधिक चौकशी करण्यात येत आहे. बडगाम जिल्ह्यातील ओमपोरामध्ये बुधवारी सकाळी जम्मू-काश्मीर बँकेजवळ एक जीवंत बॉम्ब आढळून आला. पोलिसांनी बॉम्बनाशक पथकाला पाचारण करीत हा बॉम्ब निकामी करण्यात यश मिळवले.