हैदराबाद आणि चेन्नईत काट्याची टक्कर

मुंबई : इंडियन प्रीमिअर लीगचा पहिला क्वालिफायर सामना आज सनरायझर्स हैदराबाद आणि चेन्नई सुपर किंग्जमध्ये रंगणार आहे. अंतिम फेरीतील स्थान निश्चित करण्यासाठी या लढतीला महामुकाबल्याचे स्वरूप प्राप्त झाले आहे. या लढतीमध्ये जो संघ विजेता होईल तो थेट २७ मे रोजी अंतिम लढतीसाठी पात्र ठरेल. हा सामना वानखेडे स्टेडियममध्ये खेळला जाणार आहे. अंतिम लढत याच मैदानावर होणार आहे.

यंदाच्या हंगामात चेन्नईने दोन्ही साखळी सामन्यांमध्ये हैदराबादला हरवल्यामुळे त्यांचे पारडे जड मानले जात आहे. या दोन्ही सामन्यांमध्ये अंबाती रायुडू चेन्नईच्या विजयाचा शिल्पकार ठरल्यामुळे त्याला जेरबंद करण्याचे आव्हान हैदराबादपुढे असेल. त्याने एका सामन्यात शतक झळकावले, तर दुसऱ्या सामन्यात नाबाद ७९ धावा काढल्या होत्या.

आयपीएल गुणतालिकेत हैदराबाद आणि चेन्नई या दोन्ही माजी विजेत्यांच्या खात्यावर प्रत्येकी १८ गुण जमा आहेत. निव्वल धावगतीचा किंचितसा फरक या दोन संघांमध्ये आहे. त्यामुळेच मुंबईकर क्रिकेटरसिकांना थरारक लढतींची अनुभूती मिळणार आहे. चेन्नईनेच हैदराबादची सलग सहा सामन्यांच्या विजयांची मालिका खंडित केली होती.

सनरायझर्स हैदराबादकडून हंगामात सर्वाधिक धावा काढणाऱ्या फलंदाजांच्या यादीत कर्णधार केन विल्यम्सनने ६० धावांच्या सरासरीने एकूण ६६१ धावा काढताना दुसरे स्थान मिळवले आहे. तर ’शिखर धवननेही (एकूण ४३७ धावा) सातत्याचा प्रत्यय घडवला आहे. हैदराबादच्या मधल्या फळीनेही जबाबदारीने खेळण्याची आवश्यकता आहे. ’गोलंदाजीत भुवनेश्वर कुमार, सिद्धार्थ कोल आणि संदीप शर्मा यांच्यावर वेगवान माऱ्याची धुरा आहे, तर रशिद खान आणि शकिब अल हसन यांच्यावर फिरकीची मदार आहे.

चेन्नई संघातही रायुडू (५८६) याच्याव्यतिरिक्त शेन वॉटसनही (४३८) शानदार फॉर्मात आहे. कर्णधार धोनी अनेक लढतींमध्ये फिनिशर ठरला आहे तर सुरेश रैनाने रविवारी सूत्रधाराची भूमिका बजावली आहे. दक्षिण आफ्रिकेच्या लुंगी एंगिडीने रविवारी १० धावांच्या मोबदल्यात ४ बळी घेतले. शार्दुल ठाकूर, दीपक चाहर आणि ड्वेन ब्राव्हो यांची आतापर्यंतची कामगिरी उल्लेखनीय ठरली असून फिरकीची जबाबदारी हरभजन सिंग व रवींद्र जडेजा यांच्याकडे राहील.

चेन्नई सुपर किंग्ज :
महेंद्रसिंग धोनी (कर्णधार), सुरेश रैना, रवींद्र जडेजा, फॅफ डय़ू प्लेसिस, हरभजन सिंग, ड्वेन ब्राव्हो, शेन वॉटसन, अंबाती रायुडू, दीपक चहर, के. ए. आसिफ, कनिश सेठ, लुंगी एन्गिडी, ध्रुव शोरी, मुरली विजय, सॅम बिलिंग्ज, मार्क वूड, शिट्झ शर्मा, मोनू कुमार, चैतन्य बिश्नोई, इम्रान ताहीर, कर्ण शर्मा, शार्दुल ठाकूर, एन. अ‍ॅगेडीसान, डेव्हिड विली.

सनरायझर्स हैदराबाद :
केन विल्यम्सन (कर्णधार), शिखर धवन, मनीष पांडे, भुवनेश्वर कुमार, वृद्धिमान साहा, सिद्धार्थ कौल, दीपक हुडा, खलील अहमद, संदीप शर्मा, युसूफ पठाण, श्रीवत्स गोस्वामी, रिकी भुई, बसिल थम्पी, टी. नटराजन, सचिन बेबी, बिपूल शर्मा, मेहदी हसन, तन्मय अगरवाल, अ‍ॅलेक्स हेल्स, कार्लोस ब्रेथवेट, रशिद खान, शकिब अल हसन, मोहम्मद नबी, ख्रिस जॉर्डन.

सामन्याची वेळ : सायंकाळी ७ वा.
स्थळ : वानखेडे स्टेडियम, मुंबई