हैदराबाद पोलिसांकडून दिल्ली, युपी पोलिसांनी धडा घ्यावा: मायावती

लखनऊ: हैदराबाद येथील बलात्कारातील आरोपीचे आज सकाळी पळून जात असताना एन्काउंटरमध्ये मारले गेले. या एन्काउंटरमुळे देशात संमिश्र प्रतिक्रिया उमटत आहे. आरोपींच्या एन्काउंटरनंतर बहुजन समाज पक्षाच्या नेत्या मायावती यांनी तेलंगण पोलिसांचे कौतुक केले आहे. ‘उत्तर प्रदेश व दिल्लीच्या पोलिसांनी यापासून धडा घ्यावा,’ असं मत मायावती यांनी व्यक्त केलं आहे.

उत्तर प्रदेशात महिलांवरील अत्याचारांत सतत वाढ होत आहे. मात्र, राज्य सरकार झोपलं आहे. खरंतर, तेलंगणच्या पोलिसांनी केलेल्या कारवाईपासून उत्तर प्रदेश आणि दिल्लीच्या पोलिसांनी प्रेरणा घ्यायला हवी. मात्र, यूपीमध्ये जंगलराज आहे. इथं गुन्हेगारांना सरकारी पाहुण्यासारखी वागणूक दिली जाते, हे दुर्दैव आहे,’ अशी खंत मायावती यांनी व्यक्त केली.
माजी केंद्रीय मंत्री उमा भारती यांनी देखील एन्काउंटरच्या कारवाईचं स्वागत केलं आहे. ‘ज्या क्रूरतेनं दिशाचा बळी घेतला गेला होता, ते पाहता तिच्या कुटुंबीयांचं दु:ख कधीच कमी होणार नाही. पण देशातील इतर मुलींच्या मनातील भीती नक्कीच कमी होईल,’ असं उमा भारती यांनी म्हटलं आहे.

‘लोकांचा न्यायव्यवस्थेवरील विश्वास उडाला आहे ही चिंतेची बाब आहे. सर्व सरकारांनी मिळून याबाबत आत्मपरीक्षण करण्याची गरज आहे. देशातील न्यायव्यवस्था अधिक सुदृढ बनविण्यासाठी तात्काळ पावलं उचलली जायला हवीत,’ असं दिल्लीचे मुख्यमंत्री अरविंद केजरीवाल म्हणाले.