॥ इस देश मे रहना होगा तो वंदे मातरम् कहना होगा ॥

भोपाळ। राम मंदिराला विरोध करणार्‍याचा शिरच्छेद करु असे म्हणणारे हैदराबाद येथील भाजपचे आमदार राजा सिंग पुन्हा चर्चेत आहेत. भारतात राहायचं तर वंदे मातरम म्हणावंच लागेल असं ते म्हणाले आहेत. मध्य प्रदेशच्या भोपाळमध्ये झालेल्या एका सभेत त्यांनी हे वत्कव्य केलं आहे. तुम्हाला वंदे मातरम म्हणावंच लागेल, जर तुम्ही म्हणणार नसाल तर भारतात तुमच्यासाठी कुठेही जागा नाही. तरीही जे वंदे मातरम म्हणणार नसतील त्यांच्यासाठी माझ्याकडे स्पेशल पॅकेज असल्याचे राजा सिंग यांनी सांगितले.

अयोध्यामध्ये राम मंदिर बांधण्यावरून भाजपाचे आमदार राजा सिंग यांनी यापूर्वी वादग्रस्त विधान केलं होते. जर कोणी राम मंदिर बांधण्याचा विरोध केला तर त्याचा शिरच्छेद करू असे ते म्हणाले होते. हैदराबादमध्ये एका कार्यक्रमात बोलताना त्यांनी हे वक्तव्य केले होते.

राम मंदिर बांधल्यास गंभीर परिणामांचा सामना करावा लागेल असे बोलणार्‍यांना मी सांगू इच्छितो, आम्ही तुमच्या अशाच विधानाची वाट पाहत होतो, जेणेकरून आम्ही तुमचा शिरच्छेद करू शकतो असं ते म्हणाले होते. यापुर्वीही राजा सिंग यांनी चिथावणीखोर वक्तव्य केली आहेत. राजा यांनी मध्यंतरी फेसबुकवर व्हिडीओ टाकून दलितांना मारहाण करण्याचे समर्थन केले होेते. गोमास खाणार्‍या आणि गायींची हत्या करणार्‍या दलितांना मारायला पाहिजे असेही ते म्हणाले होते.