१७ ऑक्टोबरपासून एस.टी.चा बेमुदत संप

प्रशासनावर दडपशाहीचा आरोप

• ७वा वेतन आयोग लागू करण्याची मागणी
• आंदोलने करुनही सरकारचा प्रतिसाद नाही
• नागपुरात संघटनेच्या मेळाव्याचे आयोजन
• राज्य सरचिटणीस हनुमंत ताटे यांचे अवाहन

नागपूर । राज्यातील सर्व एसटी कामगार विविध मागण्यांकरिता १७ ऑक्टोंबरपासून बेमुदत संपावर जाणार आहेत. कर्मचारी संपावर जावू नये म्हणून प्रशासनाकडून दडपशाहीचा वापर सुरू झाला आहे. परंतु हा संप अटळ असून कर्मचार्‍यांनी त्यासाठी तयार राहावे, असे आवाहन महाराष्ट्र एसटी कामगार संघटनेचे राज्य सरचिटणीस हनुमंत ताटे यांनी नागपूरातील तुळशीबाग येथे आयोजित मेळाव्यात केले. व्याप मोठा असूनही एसटी कर्मचारी कमी पगारात राबविले जातात.

ताकद दाखवण्याची गरज
अनेक वर्षांपासून शासनाकडे एसटी कामगारांनाही सेवाज्येष्ठतेनुसार पदनिहाय वेतनश्रेणी, ७ वा वेतन आयोग लागू करावा आणि इतर मागण्या केल्या जात आहे. परंतु आश्वासनाच्या व्यतिरिक्त काहीच मिळाले नाही. या विषयावर संघटनेने बरेच आंदोलन केले. परंतु सरकारवर परिणाम होत नाही. शेवटी स्वतचा हक्क मिळवण्याकरिता एसटी कामगारांना हे आंदोलन करावे लागत आहे. एसटी कामगारांचा प्रस्तावित संप मोडून काढण्याकरिता शासन आणि व्यवस्थापनाकडून प्रयत्न सुरू आहे. परंतु संप अटळ असून कर्मचार्‍यांनी आपली ताकद दाखवण्याची आता खरी गरज असल्याचे हनुमंत ताटे म्हणाले.