1 चूक आणि व्हॉट्सअ‍ॅपला बसला 21 कोटींचा दंड
रोम । व्हॉट्सअ‍ॅप युझर्ससाठी अत्यंत वाईट बातमी. ही बातमी वाचून तुम्ही व्हॉट्सअ‍ॅप वापरणेही बंद करू शकता किंवा कंपनीला खूप खूप शिव्या घालू शकता. कारण चुकच तशी झाली आहे. फालतूचे जोक्स, देश विघातक माहिती व्हॉट्सअ‍ॅपवर टाकून मोठ-मोठ्या चुका करणारे आपण अनेकजण पाहिले असतील. ज्या व्हॉट्सअ‍ॅपच्या ग्रुपमध्ये असे मेसेजेस येतील, त्या ग्रुप अ‍ॅडमिनलाच अटक केल्याच्या घटना समोर आल्या आहेत. पण, इथे चूक अ‍ॅडमिनची नाही तर थेट व्हॉट्सअ‍ॅपचीच आहे. या एका चुकीमुळे व्हॉट्सअ‍ॅपला 21 कोटींचा दंड बसला आहे. व्हॉट्सअ‍ॅपने केलेल्या या चुकीला ग्राहक कधीच माफ करणार नाहीत.
व्हॉट्सअ‍ॅपने युझर्सची खासगी माहिती लीक केल्याची गंभीर चूक केली आहे. आपल्या युझर्सची खासगी माहिती त्यांच्या परवानगीविना फेसबुकशी शेअर करण्यात आली आहे. इटलीतील ‘अँटीट्रस्ट अथॉरिटीज’ने व्हॉट्स अ‍ॅपला या फसवणुकीबद्दल 3 दशलक्ष युरो (सुमारे 21 कोटी रुपये) इतका दंड ठोठावला आहे. युरोपीय संघाच्या 28 सदस्यीय डेटा प्रोटेक्शन अथॉरिटीने गेल्या वर्षी व्हॉट्स अ‍ॅपला ताकीद दिली होती. आपल्या यूझर्सची माहिती फेसबुकला देऊ नका, असे स्पष्ट निर्देश त्यांनी दिले होते. पण या अटीचे उल्लंघन केल्याने कंपनीला 21 कोटी भरावे लागणार आहेत. भारतातही सर्वोच्च न्यायालयात या प्रकरणी याचिका दाखल करण्यात आली आहे. या माहितीच्या देवाणघेवाणीसंदर्भात ठोस कायदा बनवण्यात येत असल्याची माहिती केंद्र सरकारने न्यायालयात दिली आहे.
काय आहे प्रकरण?
2014 मध्ये मार्क झुकरबर्गच्या फेसबुकने व्हॉट्सअ‍ॅप विकत घेतल्याचे तुम्हाला माहिती असेलच. परंतु, हे होत असताना व्हॉट्सअ‍ॅप यापुढेही स्वतंत्र कंपनी म्हणूनच काम करेल आणि त्यांच्या यूझर्सची माहिती त्यांच्याकडेच राहील, असं त्यांनी स्पष्ट केले होते. त्यामुळे व्हॉट्सअ‍ॅप युझर्स निवांत होते. पण, त्यानंतर युझर्सच्या तक्रारी येऊ लागल्या त्यामुळे हे प्रकरण समोर आले. 2016 मध्ये त्यांनी प्रायव्हसी पॉलिसी बदलली. यूझर्सच्या माहितीची देवाणघेवाण सुरू झाली. या ‘डेटा शेअरिंग’ला संमती न दिल्यास यूझर्सना व्हॉट्स अ‍ॅपचा वापरच करता येत नव्हता. काहींनी त्यावर आक्षेप घेतला आणि भारतासह अनेक देशांमध्ये हा विषय न्यायालयात गेला.