10 रुपयांची नाणी नि:संकोचपणे स्वीकारा

मुंबई । 10 रुपयांची सर्व नाणी वैध असल्याचे काही दिवसांपूर्वीच रिझर्व्ह बँकेने स्पष्ट केले आहे. मात्र, अद्यापही अनेक जण 10 रुपयांची नाणी स्वीकारत नसल्याचे आरबीआयच्या निदर्शनास आले आहे. त्यामुळे आता आरबीआयने यासंबंधी थेट मोबाइलवर मेसेज पाठवणे सुरु केले आहे. 10 रुपयाचे चिन्ह असलेले आणि नसलेले अशी दोन्ही पद्धतींची 10 रुपयांची नाणी वैध आहेत, असे आरबीआयने स्पष्ट केले आहे.

आरबीआयचा नेमका मेसेज का?
10 रुपयांचे चिन्ह असलेले आणि नसलेले अशी दोन्ही प्रकारची दहा रुपयांची नाणी वैध आहेत. त्यामुळे कोणतीही काळजी न करता ही नाणी स्वीकारा तसेच यासंबंधी तुम्हाला अधिक माहिती जाणून घ्यायची असल्यास आरबीआयच्या 14440 या क्रमांकावर मिस कॉल द्या, असे आरबीआयने पाठवलेल्या मेसेजमध्ये म्हटले आहे.

10 रुपयांचा उल्लेख नसलेले नाणेही वैधच
दरम्यान, काही दिवसांपूर्वीच आरबीआयने यासंबंधी एक निवेदनही जारी केले होते. ’10 रुपयांची सर्व नाणी वैध असून स्वीकारण्यास योग्य आहेत. त्यामुळे या नाणांच्या माध्यमातून व्यवहार होऊ शकतो’, असे त्यावेळी स्पष्ट करण्यात आले होते. आरबीआयने वेळोवेळी वेगवेगळ्या डिझाइनची नाणी चलनात आणली आहेत. त्यामुळे ही सर्व नाणी वैध आहेत.