10 हजारांची लाच मागणार्या जळगावच्या परीरक्षण भुमापक एसीबीच्या जाळ्यात
रेकॉर्डमधील नाव दुरुस्तीसाठी मागितली लाच ; कार्यालयातच केली अटक
जळगाव- नगर भूमापन कार्यालयातील रेकॉर्डमधील तक्रारदाराच्या आजीच्या नावात झालेली चुक दुरुस्त करून सुधारीत उतारा देण्यासाठी 10 हजारांची मागणी करणार्या जळगाव भुमापन कार्यालयातील परीरक्षण भूमापक संगीता सुकलाल वर्दे (45) यांना जळगाव लाचलुचपत प्रतिबंधक विभागाने बुधवारी सायंकाळी पाच वाजेच्या सुमारास अटक केली. या कारवाईने भूमापन विभागातील लाचखोर कर्मचार्यांमध्ये खळबळ उडाली आहे.
लाच मागितल्याचे निष्पन्न झाल्याने कारवाई
37 वर्षीय तक्रारदाराच्या आजीच्या नावात दुरुस्ती करण्यासाठी संबंधित विभागाकडे अर्ज करण्यात आला होता. 22 ऑक्टोबर रोजी आरोपी तथा जळगाव भुमापन कार्यालयातील परीरक्षण भूमापक संगीता वर्दे यांनी दहा हजारांची मागणी केली होती. लाचेची मागणी झाल्याचा पुरावा एसीबीला मिळाल्यानंतर वरीष्ठांकडे आदेशानंतर मंगळवारी कारवाईबाबत सूचना मिळाल्यानंतर बुधवारी कार्यालयातूनच वर्दे यांना अटक करण्यात आली. ही कारवाई जळगाव एसीबीचे पोलिस उपअधीक्षक गोपाळ ठाकूर यांच्या मार्गदर्शनाखाली पोलिस निरीक्षक निलेश लोधी व सहकार्यांनी केली.
तक्रारदारांना पुढे येण्याचे आवाहन
कुठलाही शासकीय अधिकारी, कर्मचारी वा त्याच्या वतीने कुणी खाजगी इसम शासकीय कामासाठी लाचेची मागणी करीत असल्यास तातडीने जळगाव लाचलुचपत प्रतिबंधक कार्यालय, अल्पबचत भवन, जळगाव येथे वा दूरध्वनी क्रमांक 0257-2235477 तसेच मोबाईल 9607556556 तसेच टोल फ्रि क्रमांक 1064 वर संपर्क साधण्याचे आवाहन पोलिस उपअधीक्षक गोपाळ ठाकूर यांनी केले आहे.