एक क्विंटल कॅटामाइनसह १० जणांना अटक

पणजी-महसूल गुप्तचर विभागाने गोव्यातील एका कारखान्यात केलेल्या कारवाईत तब्बल १०० किलो कॅटामाइन या अमलीपदार्थाचा साठा जप्त केला आहे. रेव्हपार्ट्यांमध्ये कॅटामाईन या पदार्थाचा ड्रग्स म्हणून मोठ्या प्राणावर वापर होत असल्याचे आढळून आले आहे. अत्यंत गुप्तता राखून केवळ गोवा नाही तर संपूर्ण देशभर ही कारवाई करण्यात आली आहे.

देशभरात कारवाई
गोव्यासह देशभरात इतर ठिकाणी टाकलेल्या छाप्यात मिळून ३०८ किलो अमलीपदार्थ जप्त करण्यात आल्याची माहिती आहे. यामध्ये गुजरातचाही समावेश आहे. देशभर टाकण्यात आलेल्या छाप्यात एकूण १० मुख्य संशयितांना अटक करण्यात आली असून त्यांच्यावर एनडीपीएस कायद्या अंतर्गत कारवाई करण्यात आली आहे. अटक करण्यात आलेल्यापैकी तीन जण परदेशी नागरिक आहेत.

पणजीपासून ६० किलोमीटर दूर असलेल्या सत्तारी तालुक्यातील पिसुरलेम इंडस्ट्रियल इस्टेटमधील एका कारखान्यात सोमवारी रात्री महसूल गुप्तचर विभागाने छापेमारी केली. काल पहाटेपर्यंत ही छापेमारी सुरू होती अशी माहिती आहे. या कारखान्याला स्टील उत्पादनाचा परवाना मिळाला होता, मात्र याठिकाणी अवैध प्रकारे कॅटामाइन बनवले जात होते.

कारखान्याच्या मालकाचा चौकशीसाठी ताब्यात घेण्यात आलं आहे, पण या छापेमारीबद्दल अजून माहिती मिळालेली नाही. माहिती फुटू नये हाच त्यामागे हेतू असल्याची माहिती महसूल गुप्तचर विभागाच्या एका अधिकाऱ्याकडून देण्यात आली. ही कारवाई तीन दिवस चालू होती.