14 वर्षाच्या कारकिर्दीत मला मुरलीधरनची भीती वाटायची
मुंबई : अनेक गोलंदाजांना धडकी भरवणाऱ्या टीम इंडियाचा माजी स्फोटक फलंदाज वीरेंद्र सेहवागला मात्र एका गोलंदाजाची प्रचंड भीती वाटायची. त्याला कोणत्या गोलंदाजाची भीती वाटत होती, याबाबतचे गुपीत उघड केले असून त्याने श्रीलंकेचा महान गोलंदाज मुथैय्या मुरलीधरनची भीती वाटत असल्याचे काबुल केले आहे. “माझ्या 14 वर्षांच्या क्रिकेट कारकिर्दीत मला श्रीलंकेचा माजी गोलंदाज मुथय्या मुरलीधरनचीच भीती वाटायची”, अशा शब्दांत सेहवागने कबुली दिली आहे.
अचूक टप्पा आणि गोलंदाजी शैली
यावेळी बोलताना सेहवाग म्हणाला की, मुरलीधरनचा अचूक टप्पा आणि गोलंदाजी शैलीमुळे त्याच्या गोलंदाजीवर खेळणे अवघड होते. आणि जगातील अनेक महान फलंदाजांसाठी त्याच्या गोलंदाजीवर खेळणे हे मोठे आव्हान असल्याचे सेहवागने सांगितले. क्रिकेट कारकिर्दीत सेहवाग आणि मुरलीधरन यांचा अनेकदा सामना झाला. मुरलीधरनने तीनवेळा सेहवागला पॅव्हेलियनमध्ये पाठवले. मात्र सेहवागने 2008 च्या श्रीलंका दौऱ्यात मुरलीधरन आणि अजंता मेंडिस यांच्या गोलंदाजीवर चांगलाच प्रहार केला होता. गॅले कसोटीत सेहवागने नाबाद 201 धावा ठोकल्या होत्या.
सेहवाग-मुरलीधरन द्वंद्व
सेहवाग आणि मुरलीधरन अनेकदा आमने-सामने आले. त्यांच्यातील आणखी एक द्वंद्व 2009 मध्ये मुंबई कसोटीत पाहायला मिळाले होते. त्यावेळीही सेहवागने श्रीलंकन गोलंदाजांची धुलाई करत 293 धावा ठोकल्या होत्या. सेहवागने अनेक गोलंदाजांची धुलाई केली. त्यामध्ये मुरलीधरनचाही समावेश असला, तरी त्याच्या गोलंदाजीच्या शैलीमुळे सेहवाग काहीसा बिचकत होता. मुरलीच्या ‘दुसरा’ने तर अनेक फलंदाजांना धडकी भरवली होती. मी नव्हे तर संघातील अनेक फलंदाज आणि जगातील अनेक फलंदाज त्याच्या गोलंदाजीला घाबरत असल्याचे सेहवागने सांगितले.
मुरलीधरन सर्वकाळ आदर्श
मुरलीधरनच्या गोलंदाजी शैलीवर अनेकवेळा आक्षेप घेण्यात आले. मात्र मुरलीधरन सर्व समस्यांना सामोरे गेला. इतकंच नाही तर तो जेव्हा निवृत्त झाला, त्यावेळी जगातील सर्वाधिक कसोटी विकेट घेण्याचा विक्रम मुरलीधरनच्या नावावर होता. मुरलीधरनने 132 कसोटी सामन्यात 800 विकेट घेतल्या आहेत. मुरलीधरन हा सर्वकाळ आदर्श म्हणून ओळखला जाणारा खेळाडू आणि माणूस असल्याचे सेहवागने यावेळी सांगितले.