14 वर्षीय मुलीचा विहीरीत पडून मृत्यू

सोनगीर । तालुक्यातील चिंचवार गावातील 14 वर्षीय मुलीचा विहिरीत बुडाल्याने मृत्यू झाला घटना घडली आहे, दरम्यान गावातील महिलांनी मारहाण केल्यामुळेच या मुलीने विहिरीत उडी घेवून आत्महत्या केल्याचा आरोप तिच्या पालकांनी केला आहे. संबंधीतांवर गुन्हे दाखल केले जात नाही तोपर्यंत मृतदेह ताब्यात घेणार नाही अशी भुमिका नातेवाईकांनी घेतली होती. त्यामुळे तणाव निर्माण झाला होता.मात्र चौकशीकरुन दोषींवर गुन्हे दाखल करु असे सोनगीर पोलिसांनी सांगितल्याने जवळपास 48 तासानंतर मृतदेह नातेवाईकांनी ताब्यात घेतला.

गुन्हा दाखल करण्याची मागणी
चिंचवार गावातील ज्योती निंबा पाटील (वय 14) या मुलीचा मृतदेह मंगळवारी दुपारी 2 वाजेच्या सुमारास तिच्याच शेतात आढळून आला. याप्रकरणी सोनगीर पोलिसांनी अकस्मात मृत्यूची नोंद केली आहे. मात्र मुलीचा मृत्यू अकस्मात नसून तिने आत्महत्या केल्याचा आरोप तिच्या नातेवाईकांचा आहे. नातेवाईकांच्या म्हणण्यानुसार दोन दिवसापूर्वी ज्योती आणि गावातील मुलींचे भांडण झाले होते. त्या भांडणातून ज्योतीला काही महिलांनी मारहाण केली.

परिसरात तणाव
जोपर्यंत संबंधीतांवर गुन्हे दाखल होत नाही.तोपर्यंत ज्योतीचा मृतदेह ताब्यात घेणार नाही,धनगर समाजाचे नेते अण्णा सूर्यवंशी आणि नातेवाईकांनी घेतली होती.त्यामुळे तणाव निर्माण झाला होता.मात्र सोनगीर पोलिसांनी मृताच्या नातेवाईकांना चौकशीअंती दोषींवर गुन्हे दाखल करु असे आश्‍वासन दिल्याने मृतदेह ताब्यात घेण्यात आला.मयत ज्योतीवर दुपारी उशिरा अंत्यसंस्कार करण्यात आले.