अल्पवयीन मुलीचा विनयभंग : पिता-पूत्राला अटक

यावल : तालुक्यातील चिखली बुद्रुक गावातील 16 वर्षीय अल्पवयीन मुलीचा विनयभंग केल्याप्रकरणी पिता-पूत्राविरोधात गुन्हा दाखल करण्यात आला असून दोघा आरोपींना अटक करण्यात आली. ही घटना गुरुवारी अकरा वाजेच्या सुमारास तक्रारदाराच्या घरासमोर घडली.

फैजपूर पोलिसात गुन्हा
चिखली बुद्रुक, ता.यावल येथील 16 वर्षीय अल्पवयीन मुलीने फैजपूर पोलिसात दिलेल्या फिर्यादीनुसार, गुरुवारी सकाळी 11 वाजता ती घराच्या समोर असताना गावातील रहिवासी ऋषिकेश गोपाळ पाटील व त्याचे वडील गोपाळ भास्कर पाटील आले व मागील भांडणाच्या कारणावरून त्यांनी अल्पवयीन मुलीस व तिच्या आईला चापटाबुक्क्यांनी मारहाण केली तसेच भांडणात अल्पवयीन मुलीच्या मनाला लज्जा उत्पन्न होईल, असे कृत्य त्यांनी केले. अल्पवयीन मुलीने फैजपूर पोलिस ठाणे गाठून तक्रार दिल्यानंतर दोघा पिता-पुत्र विरुद्ध बालिकेचा विनयभंग, मारहाण, शिवीगाळ करण्यासह पोस्को कलमांद्वारे गुन्हा दाखल करण्यात आला. पोलिस कर्मचारी सुशीला भिलाला यांनी फिर्याद घेतली. दोन्ही आरोपींना पोलिसांनी अटक केली असून न्यायालयाने त्यांची न्यायालयीन कोठडीत रवानगी केली आहे. पुढील तपास डीवायएसपी डॉ.कुणाल सोनवणे यांच्या मार्गदर्शनाखाली सहाय्यक पोलिस निरीक्षक सिद्धेश्वर अखेगावकर करीत आहेत.