नंदी प्यायला पाणी मात्र ………………

जळगाव – खूप वर्षांपूर्वी गणपती बाप्पा दूध प्यायला होता. एवढाच काय तर त्याची चर्चा संपूर्ण भारत झाली होती. मात्र ती अंधश्रद्धा ठरली होती, गुरुवारी असाच प्रकार जळगाव शहरात पाहायला मिळाला. जळगाव शहरालगत असलेल्या शिरसोली गावातील एका मंदिरात हा प्रकार सकाळी १० वाजता सुरु झाला. नंदीच्या मूर्तीला काही भाविकांनी चमच्याच्या साहाय्याने पाणी पाजून पाहिले. एक-एक करता सर्वांच्याच हाताने नंदी पाणी पिऊ लागला. बघता-बघता भाविकांच्या रांगा लागल्या. घरून ग्लास, तांबे घेऊन लोक मंदिरात येऊ लागले. भगवान महादेवांच्या नावाचा जयघोष करीत नंदीला पाणी पाजू लागले. जळगाव जिल्ह्यासह राज्यात अनेक ठिकाणी असे प्रकार घडले. काहींनी हा प्रकार अंधश्रद्धा समजला तर काहींनी श्रद्धा समजून इतरांना देखील कळविले.

अंधश्रद्धा निर्मूलन समितीचे महाराष्ट्र राज्य कार्याध्यक्ष प्रा.दिगंबर कट्यारे यांच्याशी याबाबत संवाद साधला असता ते म्हणाले कि मूर्ती कधीच पाणी किव्वा दूध पित नसते. वैज्ञानिकदृष्ट्या पाण्याच्या पृष्टीय ताणाच्या अप्रभावामुळे हा प्रकार घडत असतो. पाणी आणि मूर्ती या दोन्ही वेगवेगळ्या गोष्टी असल्याने त्या काहीश्या आकर्षित होऊ शकतात. एखादा साधा दगड देखील १ किंवा २ थेंब पाणी आतमध्ये घेऊ शकतो. सोशल मीडियाचा गैरवापर करीत ही अफवा पसरवली जात असून नागरिकांच्या श्रद्धेचा उपयोग केला जात आहे. नंदी पाणी पितो असे कुणी सिद्ध केल्यास त्याला २१ लाखांचे बक्षीस देण्यात येईल, असे प्रा.कट्यारे यांनी स्पष्ट केले.