3 महिन्यांत स्वाईन फ्लूचे 19 बळी
नागपूर । अवकाळी पावसामुळे स्वाईन फ्लूची दहशत कमी होण्याऐवजी वाढली आहे. तीन महिन्यात नागपूर विभागात 81 रुग्ण पॉझिटीव्ह असून या रोगाने आतापर्यंत 19 रुग्णांचा बळी घेतला आहे. यात 13 महिला असून पाच बालकांचा समावेश आहे.स्वाईन फ्लू रुग्णांची संख्या दिवसेंदिवस वाढतच आहे. प्रशासनाकडून उपाययोजनांचे दावे केले जात असले तरी स्थिती नियंत्रणाबाहेर जात असल्याचे चित्र आहे. राज्याचे मुख्यंमत्री याचा बालेकिल्ला असलेल्या नागपूरातील ही स्थिती आहे.
नागपुरात 45 रुग्ण पॉझिटीव्ह
महानगरपालिकेच्या आरोग्य विभागाने दिलेल्या माहितीनुसार शहरात आतापर्यंत स्वाईन फ्लूचे 45 रुग्ण पॉझिटीव्ह आले आहेत. यातील 29 रुग्ण बरे झाले असून त्यांना रुग्णालयातून सुटी देण्यात आली आहे, सात रुग्ण अजूनही उपचार घेत आहे. नऊ रुग्णांचा मृत्यू झाला आहे. यात पाच बालकांचा समावेश आहे.
मेडिकलमध्ये दोघांचा मृत्यू
मेडिकलमध्ये उपचार घेत असलेल्या स्वाईन फ्लूच्या दोन रुग्णांचा मृत्यू झाला. यात 27 वर्षीय अंजुम सय्यद, (रा. मोठा ताजबाग) व 42 वर्षीय धनपाल ठाकरे (रा. दुर्गा नगर )अशी मृताची नावे आहे. या शिवाय तीन रुग्ण उपचार घेत असून प्रकृती स्थिर असल्याचे डॉक्टरांचे म्हणणे आहे. यात सात वर्षीय मुलीचाही समावेश आहे. यावर डॉक्टरांनी लक्ष ठेवून आहे मात्र प्रशासन स्वाईन फ्ल्यू ला आळा घालण्यात अपयशी ठरले आहे.