30 ऑगस्टपर्यंत पाणी मागणी अर्ज पाठवा

जळगाव। लघु पाटबंधारे विभाग, जळगाव यांच्या कार्यकक्षेत येणार्‍या सर्व लघुतलाव, साठवण तलाव व कोल्हापूर पध्दतीचा बंधारा यावरील प्रकल्पावर जेथे शक्य असेल तेथे कालव्याव्दारे (प्रवाही) तसेच प्रकल्पाच्या जलाशयातून उपसा सिंचनाने पाण्याचा उपयोग घेणार्‍या सर्व बागायतदारांनी त्यांचे पाणी मागणी अर्ज 30 ऑगस्ट पर्यंत आपल्या भागातील संबंधित लघु पाटबंधारे बांधकाम उपविभागात कार्यालयीन वेळेत पोष्टाने अगर प्रत्यक्ष देण्याचे आवाहन कार्यकारी अभियंता लघु पाटबंधारे विभाग, जळगाव यांनी केले आहे.

7/12 उतारा किंवा खातेपुस्तीका दाखविणे आवश्यक
खरीप हंगाम 2017-18 या वर्षामध्ये नवीन उपलब्ध होणारा पाणीसाठा गृहीत धरुन 1 जुलै 2017 ते 14 ऑक्टोबर 2017 या मुदतीत साळ, ज्वारी, कपाशी, भाजीपाला, इतर तेलबिया कडधान्य व भूसार पिके यासारख्या पिकांना पाणी पुरवठा करण्याचे ठरविण्यात आले आहे. तरी पाणी अर्ज नमूना नं. 7 व पाणी अर्ज नमुना 7 अ वर मागणी करावी. सिंचनाच्या पाणी पुरवठयासाठी खरीप हंगाम सन 2016-17 अखेर संपूर्ण थकबाकी भरणे आवश्यक आहे. पाटमोट संबंध नसावा. प्रत्येक चारीवर सलग क्षेत्रासच मंजुरी देण्यात येईल. शेतचारी स्वच्छ व गवत काढलेली असावी. पाणी अर्जाचा निर्णय संबंधित उपविभाग, ग्रामपंचायत कार्यालयाच्या नोटीस बोर्डावर जाहीर करण्यात येईल. मंजूर क्षेत्र व मंजुर पिकानांच पाणी घेता येईल. पाणी अर्ज देतांना 7/12 उतारा किंवा खाते पुस्तीका संबंधित उपविभागास दाखविणे आवश्यक आहे. असे कार्यकारी अभियंता, लघु पाटबंधारे विभाग, जळगाव यांनी कळविले आहे.