300 विकासकामांचा निधी इतर कामांसाठी वर्ग

सत्ताधार्‍यांचा विक्रम : 270 प्रस्ताव अवघ्या तासाभरात मंजूर; 65 कोटींचा निधी वळविला

पुणे : महापालिकेच्या 2018-19मधील अंदाजपत्रकात सुचविण्यात आलेली तब्बल 300हून अधिक वेगवेगळ्या विकासकामांचा निधी इतर कामांसाठी वळविण्यात आला आहे. जुलै आणि ऑगस्ट महिन्याच्या मुख्यसभांमध्ये तब्बल 270हून अधिक प्रस्तावांद्वारे सुमारे 65 कोटींचा निधी वळविण्याचा विक्रमच सत्ताधारी भाजपने केला आहे.

महापालिकेचे अंदाजपत्रक एप्रिल, 2018मध्ये सुरू झाल्यानंतरच तातडीने हे प्रस्ताव स्थायी समितीसमोर मान्यतेसाठी आले होते. मात्र, स्थायी समितीकडून ते थांबविण्यात आले होते. अखेर हे 270 प्रस्ताव अवघ्या तासाभरात मंजूर करण्यात आले आहेत.

या प्रस्तावांमध्ये प्रामुख्याने नगरसेवकांनी अंदाजपत्रकात सुचविलेल्या कामांसाठीच्या सूचना ‘सह्याद्री’मधीलही आहेत. त्यात रस्ते, समाज मंदिर, पदपथ, विद्युत व्यवस्था, तसेच इतर देखभाल दुरुस्तीच्या कामाच्या नावाखाली प्रस्तावित करण्यात आलेला निधी, ज्यूट बॅग खरेदी करणे, प्रभागासाठी बाकडे खरेदी करणे, ड्रेनेज लाइन बदलणे, पेव्हरिंग ब्लॉक बसविणे, विद्युत व्यवस्था करणे या कामांसाठी वळविण्यात आला आहे. सात लाखांपासून ते तब्बल एक कोटी 50 लाख रुपयांपर्यंतची ही
वर्गीकरणे आहेत.

मोडतोडीचे अंदाजपत्रक

धक्कादायक बाब म्हणजे ही वर्गीकरणे ज्या कामांसाठी मंजूर करण्यात आली आहेत, त्या कामांसाठी प्रत्यक्षात या वर्गीकरणाद्वारे वळविण्यात आलेल्या रकमेपेक्षा कितीतरी अधिकपट खर्च येणार आहे. त्यामुळे अंदाजपत्रकाची अंमलबजावणी सुरू होऊन अवघे चार महिने झाले असतानाच एवढ्या मोठ्या प्रमाणात अंदाजपत्रकाची मोडतोड झाली आहे. त्यामुळे यावर्षीचे अंदाजपत्रक हे केवळ प्रशासनाने प्रस्तावित केलेल्या कामांचीच अंमलबजावणी करणारे ठरणार असल्याचे, या वर्गीकरणांवरून दिसून येत आहे.