4 दहशतवादी ठार, 1 जवान शहीद

नवी दिल्ली । जम्मू-काश्मीरमधील माछिल सेक्टरमध्ये बुधवारी लष्कराने 4 दहशतवाद्यांना कंठस्नान घातले. याच सेक्टरमध्ये 26 मे व 27 मे रोजी 6 दहशतवाद्यांना कंठस्नान घालण्यात आले होते. मागील 12 दिवसात या सेक्टरमध्ये 12 दहशतवाद्यांना यमसदनी पाठविण्यात आले. उत्तर काश्मीरमधील कुपवारा जिल्ह्यात नौगाम सेक्टरमध्ये घुसखोरी करण्याचा प्रयत्न करणार्‍या 4 दहशतवाद्यांना जवानांनी ठार केले आहे. बुधवारी सकाळी दहशवाद्यांनी नियंत्रण रेषा पार करुन घुसखोरीचा प्रयत्न केला. लष्कराने दहशतवाद्यांचा घुसखोरीचा प्रयत्न उधळून लावत दहशतवाद्यांना यमसदनी धाडले. दहशतवाद्यांनी केलेल्या हल्ल्यात एक जवान शहीद झाला आहे.

लष्कर अधिकार्‍याने दिलेल्या माहितीनुसार, नौगाम सेक्टरमध्ये पाठवण्यात आलेल्या जवानांना नियंत्रण रेषेवर सकाळी काही दहशतवादी हालचाल करत असून घुसखोरीचा प्रयत्न करत असल्याचं लक्षात आले. यानंतर जवानांनी तात्काळ कारवाई करत दहशतवाद्यांवर गोळीबार करण्यास सुरुवात केली. जवानांनी केलेल्या गोळीबारानंतर दहशतवाद्यांनीही हल्ला करण्यास सुरुवात केली.