आदर्श आचारसंहितेचे काटेकोरपणे पालन करा

चाळीसगाव । जिल्हा परिषद, पंचायत समितीच्या सार्वत्रिक निवडणुका ह्या निर्भय आणि पारदर्शी वातावरणात पार पडण्यासह सर्व यंत्रणांनी आदर्श आचारसंहितेचे काटेकोरपणे पालन करावे असे निर्देश उप विभागीय अधिकारी तथा निवडणूक निर्णय अधिकारी शरद पवार यांनी दिले. जिल्हा परिषद, पंचायत समिती निवडणुकीच्या पार्श्वभुमीवर आचारसंहिता कक्ष कार्यान्वित करण्यात आला आहे. याबरोबरच तक्रार निवारणकक्ष, व्हिडीओ ग्राफी सर्व्हेलियन्स पथक, भरारी पथक, चेक पोस्ट पथक तात्काळ सुरु करण्याचे निर्देश संबंधितांना देण्यात आले आहेत. या निवडणूका मुक्त, निर्भय, शांततेत आणि सुव्यवस्थेत पार पडाव्यात यासाठी सर्व संबंधित यंत्रणांनी आप-आपली जबाबदारी चोखपणे पार पाडावी, अशी सूचना त्यांनी दिल्या.

निवडणूक काळात व्हिडीओ चित्रीकरण महत्त्वाचे
आचारसंहिता कालावधीमध्ये निवडणूकीच्या क्षेत्रात घडणार्‍या महत्वाच्या घटना, मिरवणूका, प्रचार फेर्‍या, सभा अथवा आचारसंहितेचा भंग होईल अशा घटनांचे व्हिडिओ चित्रीकरण करण्यात यावे. भरारी पथक स्थापन करुन रोख रकमेसह मद्याची अवैध मार्गाने वाहतूक, मतदारांना प्रलोभन ठरतील अशा व अन्य संशयास्पद हालचालींवर लक्ष ठेवून आयोगाच्या सूचनांचे काटेकोरपणे पालन करावे. निवडणूकीचे नामनिर्देशन व शपथपत्र ऑनलाईन भरण्यात येणार असून अर्जाची प्रत स्वाक्षरी करुन निवडणूक निर्णय अधिकारी यांच्याकडे विहित वेळेते दाखल करणे आवश्यक आहे. निवडणूक निर्णय अधिकार्‍यांच्या माध्यमातून मदत कक्षांची स्थापना देखील करण्यात येणार असल्याचे त्यांनी यावेळी सांगितले. यावेळी सहाय्यक निवडणूक निर्णय अधिकारी तथा तहसिलदार कैलास देवरे, उप विभागीय पोलीस अधिकारी अरविंद पाटील, गट विकास अधिकारी ए.बी.राणे, पोलीस निरिक्षक (शहर) आदिनाथ बुधवंत, पोलीस निरिक्षक (ग्रामीण) एस.पी.गायकवाड, सहा.पोलीस निरिक्षक (मेहुणबारे) डि.के.शिरसाठ, उप अधिक्षक भुमी अभिलेख बी.सी.अहिरे, नायब तहसिलदार (निवडणुक) विजय सुर्यवंशी, नायब तहसिलदार विशाल सोनवणे यांच्यासह तालुक्यातील सर्व विभाग प्रमुख यावेळी उपस्थित होते.