पत्नीवर खुनी हल्ला, मुलासमोरच विष घेतले!
हिंजवडी : मेहुण्याने जमिनीच्या व्यवहारात फसवल्याने राग अनावर झालेल्या पतीने पत्नीवर कोयत्याने वार केले. त्यानंतर आपल्या सहा वर्षांच्या मुलासमोर विषारी औषध पिऊन जीवनयात्रा संपवल्याची खळबळजनक घटना हिंजेवडी येथील जांबे नेरे येथे गुरुवारी सकाळच्या सुमारास घडली. दिलीप मोतीराम राठोड (वय 38, रा. साखर कारखाना रोड, नेरे) असे आत्महत्या करणार्‍या पतीचे नाव आहे. दरम्यान, त्याची पत्नी ललिता दिलीप राठोड (वय 30) या गंभीर जखमी झाल्या असून, त्यांच्यावर पिंपरीतील वायसीएम रुग्णालयात उपचार सुरू आहेत.
पती-पत्नीत कडाक्याचे भांडण
राठोड दाम्पत्य येथील नीलेश भोसले यांच्या सिमेंट विटा बनविण्याच्या कारखान्यावर गेल्या दोन महिन्यांपासून कामाला होते. अलीकडे दिलीप हा अलर्ट या सुरक्षारक्षक एजन्सीमार्फत येथे रखवालदाराचेही काम करत होता. गुरुवारी सकाळी साडेसातच्या सुमारास मोठ्या मुलाला सहलीला जायचे असल्याने दिलीपने त्याला शाळेत नेऊन सोडले. तिकडून येताच पती-पत्नीत कडाक्याचे भांडणे सुरू झाले. या भांडणात दिलीपने पत्नीवर कोयत्याने वार केले. हा प्रकार शेजार्‍यांना समजताच त्यांनी मध्यस्थी करीत जखमी ललिता यांना नेरेतील खाजगी रुग्णालयात हलविले. प्रथमोपचार केल्यानंतर त्यांना वायसीएम रुग्णालयात हलविण्यात आले.
जमिनीच्या व्यवहारातून घटना!
पोलिसांच्या माहितीनुसार, दिलीप राठोड याची त्याच्या मेहुण्याने जमिनीच्या व्यवहारात फसवणूक केली होती. त्यावरून दिलीपला राग आला होता. याच रागातून त्याने पत्नीशी भांडण केले होते. भांडणात त्याने पत्नीवर कोयत्याने वार केले. त्यानंतर घटनास्थळी असलेल्या आपल्या सहा वर्षांच्या मुलासमोर दिलीपने विषारी औषध पिऊन आत्महत्या केली. दरम्यान, ही घटना जमिनीच्या व्यवहारातून झाल्याची शक्यता पोलिसांनी वर्तवली आहे. जमिनीचा वाद असल्याचा उल्लेख केलेली चिठ्ठी दिलीप याने आत्महत्येपूर्वी लिहून ठेवल्याचे सूत्रांकडून सांगण्यात येत आहे. पुढील तपास हिंजवडी पोलिस करत आहेत.