8 वी शिकलेले बोगस डॉक्टर

मुंबई । रुग्णासाठी डॉक्टर हा दुवासमान असतो मात्र तोच डॉक्टर जेव्हा रुग्णाच्या जीवाशी खेळतो तेव्हा रुग्णाला यमाची नाही अशा बोगस डॉक्टरची भीती अधिक वाटते. कुठलीही पदवी नाही अथवा कुठलेही वैद्यकीय शिक्षण नसतानाही केवळ दुसर्‍या व्यक्तीच्या वैद्यकीय प्रमाणपत्रावर स्वतःच्या नावाचे लेबल चिकटवून दवाखाने चालवणार्‍या बोगस डॉक्टरांना चेंबूर पोलिसांनी गजाआड केले. चेंबूर परिसरातील दोन आणि कुर्ला पूर्वेतील एका बोगस डॉक्टराला पोलिसांनी ताब्यात घेतले आहे. जहीर बशीर अहमद शेख (36), फरमनअली जाहिद हुसेन बेग (36), आसिफ हुसेन वली अहमद शेख (47) असे अटक करण्यात आलेल्या बोगस डॉक्टरांची नावे आहेत. हे सर्वजण प्रत्यक्षा 8वी, 11वी आणि 12वी इयत्ता उत्तीर्ण झालेले आहेत.

वैद्यकीय आरोग्य अधिकार्‍यांच्या सर्वेक्षणावर प्रश्‍नचिन्ह
मुंबईत बोगस डॉक्टरांचे प्रमाण काही कमी नाही. कुठलीही पदवी अथवा वैद्यकीय शिक्षण न घेता मुंबईतील विविध झोपडपट्ट्यांमध्ये शेकडो बोगस डॉक्टरांनी दुसर्‍याच्या नावे असलेल्या प्रमाणपत्रावर बनावट पदवीच्या आधारे आपली दुकाने थाटली आहेत. 2015 साली मुंबई महापालिकेने केलेल्या सर्वेक्षणात 95 बोगस डॉक्टर आढळून आले होते. तदनंतर सार्वजनिक आरोग्य खात्यातर्फे बोगस डॉक्टरांना आळा बसावा यासाठी वैद्यकीय आरोग्य अधिकारी यांच्यातर्फे वेळोवेळी सर्वेक्षण करण्यात येते या सर्वेक्षणात अनधिकृत व्यावसायिकांची शैक्षणिक पदवी, नोंदणी प्रमाणप्तर तपासण्यात येते. या प्रमाणपत्रांमध्ये काही शंका असल्यास ते वैद्यकीय परिषदेकडे पाठवण्यात येते वा खोटी आढळ्यास पूर्ण माहितीसह संबंधित पोलीस ठाण्यात तक्रार करण्यात येते हा कायदा वा नियम असताना देखील कायद्याचे हे नियम धाब्यावर बसवून बोगस डॉक्टरांचा सुळसुळाट वाढतच आहे आणि असे होऊनदेखील वैद्यकीय आरोग्य अधिकार्‍यांचे सर्वेक्षणात मात्र काहीशी त्रुटी नक्कीच दिसून येते.

मागील आठवड्यात 8 नोव्हेंबर रोजी देवनार येथे प्रदिप आनंदा जाधव (25) या युवकाचा चुकीच्या वैद्यकीय उपचारामुळे मृत्यू झाला होता. याप्रकरणी जाधव कुटुंबाच्या नातेवाइकांनी देवनार पोलीस ठाण्यात तक्रार दाखल केली असता देवनार पोलिसांनी केलेल्या चौकशीत युवकांनी उपचार केलेल्या संबंधित डॉक्टरकडे कोणतेही पदवी शिक्षण आणि वैद्यकीय प्रमाणपत्र नसल्याचे आढळले. त्या बोगस डॉक्टरविरोधात देवनार पोलीस ठाणे येथे 257 /17, कलम 304 , 420 भादंविसह 33, 36 महाराष्ट्र वैद्यक व्यवसायी अधिनियम 1961 अन्वये गुन्हा नोंद करण्यात आला आहे.

युवकाच्या या गंभीर घटनेच्या आधारे सदर परिसरात अजूनही बोगस डॉक्टर असावे का? या पोलिसांनी मिळवलेल्या माहितीनुसार चेंबूर परिमंडळ 6 चे पोलीस उपायुक्त शाहजी उमप यांनी दिलेल्या चौकशीच्या आदेशानंतर नेहरूनगर पोलीस ठाण्याचे पोलीस उपनिरीक्षक सर्जेराव पाटील व सुभाष राठोड, टिळकनगर पोलीस ठाण्याचे पोलीस उपनिरीक्षक शंकर धायगुडे व अमोल आंबवणे यांनी अत्यंत कल्पकतेने या बोगस डॉक्टरांचा सुगावा मिळावा यासाठी अन्य रुग्णाला अशा बोगस डॉक्टरांकडे पाठवून सदर डॉक्टर उपचारासाठी वापरत असलेले औषधे व दवाखान्यातील भिंतीवर चिकटवलेले छापील प्रमाणपत्र तपासून पोलिसांनी शक्कलतेने या रुग्णाशी बोगसगिरी करणार्‍या डॉक्टरांना ताब्यात घेतले.

सर्वसामान्यांचे जीव धोक्यात
पोलीस उपायुक्त शाहजी उमप यांनी अटकेत असलेल्या बोगस डॉक्टरांची दिलेल्या माहितीनुसार जहीर बशीर अहमद शेख (36) हा 12 वी पास असून कुर्ला पूर्व येथील बडी मस्जिदच्या बाजूला स.गो.बर्वे मार्गावर कृपाशंकर रामनरेश मिश्र (बीएमएस ) यांचे नावे असलेल्या प्रमाणपत्रावर क्रान्ति आयुर्वेदिक दवाखाना चालवत असे. फरमनअली जाहिद हुसेन बेग (36) हा 11 वी पास असून चेंबूर येथील आचार्य मार्ग येथील शॉप नंबर 133 येथे डॉ. ए. अन्सारी (बीयूएमएस, मुंबई) यांच्या नावे असलेल्या प्रमाणपत्रावर दवाखाना चालवत असे, आसिफ हुसेन वली अहमद शेख (47) हा 8 वी पास असून चेंबूर फाटक अमर महल येथे डॉ. अर्शद ए जाफरी (बीएससी, एमए , बीएचएमएस) यांच्या नावे असलेल्या प्रमाणपत्रावर दवाखाना चालवत असे. अटक करण्यात आलेले डॉक्टर हे गेली 15 वर्षे या प्रमाणपत्रावर प्रॅक्टिस करत असल्याच्या माहितीच्या निदर्शनात पोलिसांनी आढळून आले. अटक करण्यात आलेल्या बोगस डॉक्टरांवर भादंवि कलम 419, 420 गुन्हा 33, 36 मेडिकल प्रॅक्टिस अ‍ॅक्टनुसार गुन्हा नोंद करण्यात आला आहे.