चापटा बुक्क्यांनी मारहाण करीत धमकी दिल्याने २३ वर्षीय युवकाची आत्महत्या

यावल ( प्रतिनिधी ) तालुक्यातील चितोडा येथील २३ वर्षीय तरूणास दोन महिलासह पाच जणांनी अज्ञात कारणावरून चापटा बुक्क्यांनी मारहाण करत व गावातून निघून जा अशी धमकी दिल्याने युवकाने घाबरून जाऊन यावल शिवारातील विहिरीत उडी मारून आत्महत्या केल्याची फिर्याद मयत युवकाचे वडील संतोष बाबुराव किनगे यांनी येथील पोलीस ठाण्यात फिर्याद दिल्यावरून गावातील दोन महिलांसह पाच जणांविरुद्ध आत्महत्येस प्रवृत्त केल्याचे कारणावरून गुन्हा दाखल करण्यात आला आहे.
याबाबत पोलीस सूत्रांनी दिलेली माहिती अशी की,तालुक्यातील चितोडा येथील दुर्गेश संतोष किनगे वय २३ वर्ष या तरूणास अज्ञात कारणावरून गावातील दोन महिला सह भास्कर आनंदा जंगले,भूषण भास्कर जंगले,ज्ञानेश्वर भास्कर जंगले यांनी गुरुवारी सकाळी नऊ वाजेच्या पुर्वी गावात संतोष किनगे यास त्याच्या घरासमोर चापटा बुक्क्यांनी मारहाण करत शिवीगाळ करीत तु गावातून निघून जा अशी धमकी दिल्याने,युवकाने घाबरून जात यावल शिवारातील देविदास तुकाराम पाटील यांचे गट नंबर ५५७ चे शेतातील विहिरीत उडी मारून आत्महत्या केली. प्रथम गुरुवारी दुपारी चितोडा गावाचे पोलीस पाटील पंकज वारके यांचे खबरी वरून यावल पोलीस ठाण्यात आकस्मात मृत्यूची नोंद करण्यात आली होती. तर सायंकाळी उशिरा मयताचे वडील संतोष किनगे यांनी दिलेल्या फिर्यादी वरून दोन महिलासह पाच संशयीता विरुद्ध तरुणास आत्महत्या करण्यास प्रवृत्त केल्याचा कारणावरून भादवी कलम३o६,३४प्रमाणे गुन्हा दाखल करण्यात आला आहे. पोलीस निरिक्षक राकेश माणगावकर यांच्या मार्गदर्शनाखाली पोलीस उपनिरिक्षक अविनाश दहिफळे घटनेचा तपास पुढील तपास करीत आहेत.