अच्छे दिन आयेंगे!
तरूंगातून आसाराम बापूचा भक्तांशी संवाद
ऑडिओ क्लिप व्हायरल
जोधपूर : बलात्कार प्रकरणात मरेपर्यंत जन्मठेपेची शिक्षा झालेला स्वयंघोषित अध्यात्मिक गुरु आसारामची एक ऑडिओ क्लिप सोशल मीडियावर व्हायरल झाली आहे. माझा तुरुंगवास तात्पुरता असून अच्छे दिन नक्की येतील, असे आसारामने या क्लिपमध्ये म्हटले आहे. या क्लिपची दखल जोधपूर कारागृह प्रशासनानेही घेतली असली तरी कैद्याला महिन्याला 80 मिनिटे बोलण्याची मुभा असते, असे म्हणत कारागृह प्रशासनाने ही बाब सामान्य असल्याचे म्हटल्याने आश्‍चर्य व्यक्त होत आहे.
मला बदनाम करण्याचा कट
आसाराम बापू जोधपूरमधील कारागृहात असून त्याची ऑडिओ क्लिप आता व्हायरल झाली आहे. न्यायालयाने दोषी ठरवल्याच्या दोन दिवसानंतरची ही ऑडिओ क्लिप आहे. 15 मिनिटांच्या या क्लिपमध्ये आसारामने निकालाच्या दिवशी शांतता कायम राखल्याबद्दल तसेच जोधपूर न्यायालयाच्या आवारात गर्दी न केल्याबद्दल समर्थकांचे आभार मानले. आपण सर्वांनीच कायदा आणि सुव्यवस्थेचा आदर केला पाहिजे. काही लोकांनी मला आणि आश्रमाला बदनाम करुन स्वतःचे वर्चस्व निर्माण करण्यासाठी कट रचला. आश्रमाच्या लेटरहेडवर येणार्‍या पत्रकांवर विश्‍वास ठेवू नका, असेही आसारामने या ऑडिओ क्लिपमध्ये म्हटले आहे.
सर्वोच्च न्यायालय त्या चुका सुधारेल
माझ्यासह या खटल्यात दोषी ठरलेले शिल्पी आणि शरत चंद्र या दोघांची आधी तुरुंगातून सुटका व्हावी, यासाठी प्रयत्न करणार आहे. मुलांची जबाबदारी पालकांची असते. जर कनिष्ठ न्यायालयाने चुक केली असेल तर उच्च न्यायालया किंवा सर्वोच्च न्यायालय त्या चुका सुधारेल. खरे कधी लपून राहत नाही आणि खोटे फार काळ टिकू शकत नाही, अच्छे दिन नक्की येतील, असे आसारामने समर्थकांना उद्देशून म्हटले आहे. दरम्यान, जेल प्रशासनाने ही ऑडिओ क्लिप खरी असू शकते, असे सांगितले आहे. तुरुंगातील प्रत्येक कैद्याला महिन्याला 80 मिनिटे फोनवर बोलण्याची मुभा असते. आसाराम बापूने तुरुंग प्रशासनाच्या परवानगीनेच साबरमती आश्रमातील एका साधकाला फोन केला होता. त्यानेच आसाराम बापूचे बोलणे रेकॉर्ड केले असावे आणि ती क्लिप सोशल मीडियावर व्हायरल केली असावी, असे जोधपूर कारागृह विभागाचे पोलीस महासंचालक विक्रम सिंह यांनी सांगितले.