रेडिओ चॅनल मॅनेजरचा अपघाती मृत्यू

नोएडा : गाडी नाल्यात कोसळून झालेल्या अपघातात रेडिओ चॅनलमध्ये उच्च पदावर कार्यरत असलेल्या तरुणीचा मृत्यू झाला. तान्या खन्ना असे या 28 वर्षीय तरुणीचे नाव आहे. ती रेडिओ मिर्चीमध्ये एक्झिक्युटिव्ह म्हणून काम करीत होती. उघडं गटार आणि अपुरे पथदिवे यांच्यामुळे तान्याच्या गाडीला अपघात झाल्याचा दावा केला जात आहे. तान्या बुधवारी मध्यरात्री दीड वाजता वर्ना कारने घरी येत होती. सेक्टर 85 मध्ये असलेल्या चौकात वळताना तिची गाडी आठ फूट रुंद गटारात कोसळली.

तान्या रेडिओ मिर्चीत सेल्स विभागामध्ये ग्रुप मॅनेजर म्हणून कार्यरत होती. गाझियाबादमधील कवी नगर परिसरात राहत होती. गुरुग्राममधील कार्यालयातून मैत्रिणीच्या घरी जाताना हा अपघात घडला. तान्या मैत्रिणीच्या गाडीमागून तिची गाडी चालवत होती. मात्र अर्ध्या वाटेत दोघींची चुकामुक झाली. मैत्रिण पुढे निघून गेली. तान्या बराच वेळ मागे न आल्यामुळे तिची मैत्रिण परत आली, तेव्हा तान्याची कार अपघातग्रस्त झाल्याचं आणि भोवती गर्दी जमल्याचं तिला दिसलं.