अभिनेता अरमान कोहलीला कोर्टाकडून दिलासा; तुरुंगातून सुटका
मुंबई : बॉलिवूड अभिनेता अरमान कोहलीला मुंबई उच्च न्यायालयाकडून मोठा दिलासा मिळाला आहे. अरमान कोहलीने आपल्यावरील गुन्हा रद्द करण्यात यावा, यासाठी हायकोर्टात दाखल केलेली याचिका स्वीकारत कोर्टाणे त्याची जेलमधून सुटका करण्याचे आदेश जेल प्रशासनाला दिले आहेत. अरमान कोहलीच्या कुटुंबियांनी पीडित नीरु रंधावा हिच्याशी यशस्वी तडजोड केल्याणे तिने आपली तक्रार आपण मागे घेत असल्याचे हायकोर्टाला कळवले.
सामाजिक संस्थेला आर्थिक मदत
त्याचबरोबर समाजसेवा म्हणून हायकोर्टाने अरमान कोहलीला १ लाख रूपये टाटा मेमोरियलच्या लहान मुलांसाठीच्या शाखेला आणि १ लाख रूपये नॅशनल असोसिएशन फॉर ब्लाईंडला देणगी म्हणून देण्याचे आदेश दिले आहेत. न्यायमूर्ती आर.एम.सावंत आणि न्यायमूर्ती रेवती मोहिते-डेरे यांच्या खंडपीठासमोर यावर सुनावणी झाली. अरमान कोहलीणे हायकोर्टात कबुल केले आहे की ‘झालेल्या चुकीचा मला पश्चाताप होतो आहे. यापुढे अशी चूक आपल्याकडून होणार नाही. मुळात ब्रिटश नागरीक असलेल्या नीरु रंधावाणे कोहली कुटुंबियांकडून ठरलेली रक्कम स्वीकारत असल्याचे कोर्टाला कळवले. डोक्याला मलमपट्टी केलेली नीरु रंधावा सुनावणीसाठी हायकोर्टासमोर हजर झाली होती.
आपली मैत्रिण नीरू रंधावाला मारहाण केल्याबद्दल अभिनेता अरमान कोहली विरोधात मुंबईच्या सांताक्रुझ पोलीस स्थानकांत गुन्हा नोंदवला होता. या प्रकरणी अरमानला १२ जून रोजी लोणावळ्याहून अटक करण्यात आली होती. बुधवारी वांद्रे मॅजिस्ट्रेट कोर्टाणे अरमान कोहलीला १४ दिवसांची न्यायालयीन कोठडी सुनावत त्याचा जामीन अर्जही नामंजूर केला होता. आपल्यावरील गुन्हा रद्द करण्यासाठी अरमान कोहलीनं हायकोर्टात याचिका दाखल केली होती. या सुनावणीसाठी अरमानचे वडील आणि जेष्ठ सिने निर्माता राजकुमार कोहली आणि इतर कुटुंबीय हायकोर्टात उपस्थित होते.
अरमानने आपल्याला बेदम मारहाण केल्याची तक्रार त्याची गर्लफ्रेंड नीरु रंधावाने गेल्या आठवड्यात मुंबईतील सांताक्रुझ पोलिसात केली होती. त्यानंतर अरमान पसार झाला होता. त्याच्यावर कलम 323, 326, 504 आणि 506 अंतर्गत गुन्हा दाखल करण्यात आला होता. मारहाणीत नीरु रंधावाच्या डोक्याला जबर मार लागला होता. तिच्यावर अंधेरीतील कोकिलाबेन रुग्णालयात उपचार करण्यात आले होते. अरमान आणि नीरु यांच्यात घटनेच्या आदल्या दिवशी पैशांच्या देवाणघेवाणीवरुन शाब्दिक बाचाबाची झाली होती.