नोटबंदीनंतर सर्वाधिक नोटा अमित शहा संचालक असलेल्या बँकेत जमा

नवी दिल्ली: नोटबंदीनंतर चलनातून बाद ठरविण्यात आलेल्या सर्वाधिक नोटा कोणत्या बँकेत जामा झाल्या? हा अनेकांच्या उत्सुकतेचा विषय. पण, आता या प्रश्नाचे उत्तर पुढे आले आहे. नोटबंदीनंतर अहमदाबाद जिल्हा सहकारी बँकेत सर्वाधिक जुन्या नोटा जमा झाल्याची माहिती समोर आली आहे. भाजपचे राष्ट्रीय अध्यक्ष अमित शाह हे या बँकेच्या संचालक मंडळावर आहेत. माहिती अधिकार कायद्याखाली मागवलेल्या माहितीत ही माहिती पुढे आली आहे.

माहिती अधिकारातून उघड
नोटबंदीनंतर सर्वाधिक जुन्या नोटा कोणत्या बँकेत जमा झाल्या, याबाबत मुंबईतील कार्यकर्ते मनोरंजन रॉय यांनी माहिती अधिकार कायद्याखाली माहिती मागवली होती. रॉय यांना उत्तरादाखल आलेल्या माहितीत अहमदाबाद जिल्हा बँकेने सर्वाधिक जुन्या नोटा जमा केल्याचे पुढे आले. रॉय यांच्या हवल्याने प्रसारमाध्यमानी दिलेल्या माहितीनुसार, अहमदाबाद जिल्हा बँकेत नोटाबंदीच्या काळात ७४५. ५९ कोटी रुपयांच्या जुन्या नोटा जमा झाल्या.

अहमदाबाद जिल्हा बँकेचे संकेतस्थळ पाहिले असता, त्यावर अमित शाह बँकेच्या संचालक मंडळावर असल्याचे दिसते. तर, २००० सालामध्ये अमित शाह याच बँकेचे अध्यक्ष होते. दरम्यान, अहमदाबाद जिल्हा बँकेपाठोपाठ जुन्या नोटा जमा करण्यात राजकोट जिल्हा सहकारी बँकेचा क्रमांक लागतो. या बँकेने सुमारे ६९३ कोटी रुपयांच्या जुन्या नोटा जमा केल्याची माहिती पुढे आली आहे.