विमान कोसळल्याने पाच गायी ठार

जामनगर । भारतीय हवाई दलाचं जॅग्वार हे लढाऊ विमान गुजरातमधील कच्छ जिल्ह्यातील मुंद्रा परिसरात कोसळले. या दुर्घटनेत वैमानिकाचा मृत्यू झाला आहे. संरक्षण विभागाच्या प्रवक्त्यांनी दिलेल्या माहितीत जामनगरातील हवाई तळावर नियमित सराव सुरू असताना जॅग्वार हे लढाऊ विमान बेरजा गावाजवळील माळरानावर कोसळले.

या दुर्घटनेत गंभीर जखमी झालेल्या संजय चौहान या वैमानिकाचा मृत्यू झाला आहे. येथील माळरानावर चरत असलेल्या पाच गायींचाही या दुर्घटनेत मृत्यू झाल्याचे सांगण्यात येते. दरम्यान, अपघाताचं कारण समजू शकलं नसून, चौकशी करण्याचे आदेश हवाई खात्याकडून देण्यात आले आहेत, अशी माहिती लेफ्टनंट कर्नल मनीष ओझा यांनी दिली.