आपच्या आमदार अलका लांबा कॉंग्रेसमध्ये दाखल !

नवी दिल्ली: दिल्लीतील चांदणी चौक मतदारसंघातील आम आदमी पार्टीच्या आमदार अलका लांबा या गेल्या काही दिवसांपासून काँग्रेसमध्ये जाणार अशी चर्चा होती. अखेर आज त्यांनी कॉंग्रेसमध्ये प्रवेश केला आहे. दिल्लीतील कॉंगेस कार्यालयात जाऊन त्यांनी कॉंग्रेसचे सदस्यत्व स्वीकारत कॉंग्रेसमध्ये प्रवेश केला. यावेळी कॉंग्रेस नेते उपस्थित होते.

यापूर्वी त्यांनी काँग्रेस अध्यक्षा सोनिया गांधी यांची भेट घेतली होती. या भेटीनंतर त्यांच्या काँग्रेस प्रवेशाच्या चर्चांना वेग आला आहे. अनेक महिन्यांपासून त्या पक्षावर आणि पक्षप्रमुख अरविंद केजरीवाल यांच्यावर नाराज आहेत.

पुढच्या वर्षी २०२० मध्ये दिल्लीत विधानसभा निवडणुका पार पडणार आहेत. ऑगस्टमध्ये अलका लांबा यांनी आपण पक्षाच्या प्राथमिक सदस्यत्वाचा राजीनामा देणार असल्याचे घोषित केले होते. तसेच आगामी निवडणूक ही अपक्ष म्हणून लढवणार असल्याचे म्हटले होते. यावर पक्षानेही त्यांचा राजीनामा स्विकारण्यास तयार असल्याचे म्हटले होते. लांबा यांनी लोकसभा निवडणुकीत प्रचार करण्यासही नकार दिला होता.