अमेरिकेत ‘शटडाऊन’ ; सरकारी कर्मचाऱ्यांना करावे लागणार विनावेतन काम

न्युयोर्क-बेकायदा स्थलांतर रोखण्यासाठी अमेरिका-मेक्सिको सीमेवर भिंत बांधण्यासाठी ५ अब्ज डॉलर्सची मागणी अमेरिकेचे राष्ट्राध्यक्ष डोनाल्ड ट्रम्प यांनी अमेरिकी काँग्रेसकडे केली आहे. यावरून पुन्हा एकदा रिपब्लिकन व डेमोक्रॅट नेत्यांमध्ये वाद निर्माण झाला आहे. सरकारी खर्चाला परवानगी देणारे विधेयक मंजूर न करताच अमेरिकी कॉंग्रेस संस्थगित झाल्याने अमेरिका सरकारचे शटडाऊन आजपासून सुरू झाले.

ट्रम्प यांच्या मागणीवर अमेरिकी कॉँग्रेसमध्ये शुक्रवारी रात्री बारापर्यंत खर्चाला मंजुरीबाबत वादविवादात चर्चा सुरू होती. मात्र, रिपब्लिकन सरकारच्या अनेक खर्चांना डेमोक्रॅटिक सदस्यांचा विरोध होता. कॉंग्रेसमध्ये एकमत न झाल्याने कोणत्याही खर्चाच्या मंजुरीशिवाय सभागृह संस्थगित करण्यात आले. अनेक सरकारी संस्थांना कामकाज चालविण्यासाठी पैसेच न मिळाल्याने पुढील काही काळासाठी अमेरिका सरकार अंशत: ‘बंद’ असणार आहे.

या शटडाऊनमुळे अमेरिकेतील सुमारे आठ लाख सरकारी कर्मचाऱ्यांपुढे पेच निर्माण होणार आहे. त्यांना या शटडाऊनच्या काळासाठी विनावेतन काम करावे लागणार आहे. ऐन नाताळाच्या हंमागात ही स्थिती ओढवल्याने त्यांच्यात कमालीची नाराजी पसरली आहे. हे या वर्षातील तिसरे ‘शटडाऊन’ असून ते किती काळ चालेल, ते अद्याप स्पष्ट नाही. या शटडाऊनचा पहिला जोरदार फटका अमेरिकेतील शेअर बाजाराला बसला. वॉल स्ट्रीटवरील बाजाराने जबर घसरण अनुभवली. सन २००८ नंतरची ही सर्वांत मोठी घसरण होती.