अमेरिकेकडून पाकिस्तानला ‘मास्टर स्ट्रोक’

न्यूयॉर्क- दहशतवादी संघटनांवर कारवाई करण्यात अयशस्वी ठरलेल्या पाकिस्तानला अमेरिकन सरकारने ‘मास्टर स्ट्रोक’ दिला आहे. ट्रम्प प्रशासनाने संरक्षण गुंतवणुकीसंबंधीचे विधेयक संमत केले असून यामध्ये पाकिस्तानला देण्यात येणाऱ्या संरक्षण निधीमध्ये कपात केली होती तसेच आता ट्रम्प प्रशासनाने पाकिस्तान लष्कर अधिकाऱ्यांना देण्यात येणाऱ्या प्रशिक्षण आणि शैक्षणिक कार्यक्रमांमध्ये कपात केली आहे. भारताने नेहमीच आंतरराष्ट्रीय स्तरावर पाकिस्तान आपल्या जमिनीचा वापर दहशतवादी कारवायांसाठी वापरत असल्याचे सांगितले जाते.

सध्याची स्थिती पाहता गेल्यास आंतरराष्ट्रीय स्तरावर पाकिस्तानवर भारताचा दबाव वाढत असल्याचे दिसत आहे. अमेरिकेच्या अधिकाऱ्यांचे म्हणणे आहे की, लष्कर प्रशिक्षण आणि शैक्षणिक कार्यक्रम गेल्या एक दशकापासून द्विपक्षीय लष्कर संबंधाचं प्रतिक राहिले आहे. ट्रम्प सरकारच्या निर्णयावर अमेरिका आणि पाकिस्तान दोन्हीकडून सकारात्मक आणि नकारात्मक प्रतिक्रिया मिळत आहेत. मात्र पाकिस्तान लष्कराने अद्याप यावर कोणतीही अधिकृत प्रतिक्रिया दिलेली नाही.

पाकिस्तानी अधिकाऱ्यांकडून निर्णयावर प्रचंड नाराजी व्यक्त होत आहे. यामुळे पाकिस्तानी लष्कर लीडरशीप ट्रेनिंगसाठी रशिया किंवा चीनकडे जाऊ शकते  असे त्याचे म्हणणे आहे. अमेरिकन संरक्षण विभागाच्या प्रवक्त्यांनी दिलेल्या माहितीनुसार, ट्रम्प सरकारच्या निर्णयामुळे पाकिस्तानच्या ६६ अधिकाऱ्यांची संधी हिरावली गेली आहे. अशा परिस्थितीत पाकिस्तानी अधिकाऱ्यांची जागा भरण्यासाठी दुसऱ्या देशातील अधिकाऱ्यांना संधी देण्यात येईल.