बारामतीत ५ मे पासून प्लॅस्टिक बंदी

पुणे – प्लॅस्टिक बंदीची अंमलबजावणी प्रभावी करण्यासाठी बारामती नगरपालिकेने दंडात्मक कारवाईचा निर्णय घेतला आहे. येत्या ५ मे पासून या कारवाईच्या अंमलबजावणीला सुरुवात होईल. नगराध्यक्षा पौर्णिमा तावरे, उपनगराध्यक्ष बिरजू मांढरे, गटनेते सचिन सातव आणि मुख्याधिकारी योगेश कडूसकर यांनी याबाबत माहिती दिली.

प्लॅस्टिकपासून बनविल्या जाणाऱ्या पिशव्या (हँडल असलेल्या व नसलेल्या), थर्माकोल, प्लॅस्टिकपासून बनविण्यात येणाऱ्या आणि एकदाच वापरल्या जाणाऱ्या ताट, वाटी, चमचा, कप, प्लेट, ग्लास अशा वस्तूसह हॉटेलमध्ये अन्नपदार्थ पॅकींगसाठी वापरले जाणारे भांडे, स्ट्रॉ, द्रव पदार्थ साठविण्यासाठी वापरात येणारे प्लॅस्टिक पाऊच, अन्नपदार्थ आणि धान्य साठविण्यासाठी पॅकेजिंगसाठी वापरले जाणारे प्लास्टिक वापरावर बंदी घालण्यात आली आहे. तसेच प्लास्टिक उत्पादन, वापर, साठवणूक, वितरण आणि घाऊक तसेच किरकोळ विक्रीवरही बंदी घालण्यात आली आहे.

नगरपालिकेच्या वतीने प्लास्टिक संकलन मोहिम सुरू करण्यात आली आहे. येत्या ५ मे पर्यंत शहरवासीयांकडे असलेले बंदी घालण्यात आलेले प्लास्टिक नगरपालिकेकडे जमा करावे, असेही आवाहन करण्यात नगरपालिकेकडून करण्यात आले आहे. तसेच सर्व शासकीय, अशासकीय कार्यालये,संस्था, शैक्षणिक संस्था, चित्रपट व नाट्यगृह, औद्योगिक संस्था, समारंभाचे हॉल, हॉटेल्स, धाबे, दुकानदार, मॉल्स, इतर विक्रेते, केटरर्स, फेरीवाले, वाहतूकदार, भाजीपाला व फळे विक्रेते या सह इतरही नागरिकांनी या मोहिमेत नगरपालिकेस सहकार्य करण्याचे आवाहन नगराध्यक्षांनी यावेळी केले.

दंडाची शिफारस
प्लॅस्टिक बंदीच्या कालावधीनंतर प्लास्टिकचा वापर आढळून आल्यास प्रथम वेळेस ५ हजार, दुसऱ्या वेळेस १० हजारांच्या दंडाची आकारणी केली जाणार आहे. दोनदा संधी देऊनही तिसऱ्यांदा जर प्रतिबंधित प्लॅस्टिक सापडल्यास २५ हजारांचा दंडासह ३ महिने कारावासाची तरतूद या बाबतच्या कायद्यात असून त्याचा वापर प्रशासन काटकोरपणे करणार आहे.