सर्वाधिक वीज चोरणारे मुस्लिम; भाजप आमदाराचे वादग्रस्त वक्तव्य

लखनौ-उत्तरप्रदेशच्या कौशंबी येथील चायल मतदारसंघाचे भाजपा आमदार संजय गुप्ता यांनी पक्षाच्या अडचणी वाढवणारे एक वादग्रस्त विधान केले आहे. गुप्ता यांचा वादग्रस्त ऑडियो सध्या व्हायरल होत आहे. यामध्ये ते वीज वितरण विभागाच्या एका अधिकाऱ्याशी बोलताना मुसलमानांवर वीजचोरीचा आरोप करत आहेत. ९० टक्के वीजचोरीमध्ये मुसलमानांचा सहभाग आहे, मग तुम्ही त्यांच्यावर कारवाई का नाही करत, असे आमदार गुप्ता सांगत आहे.

एफआयआर दाखल करावा

व्हायरल क्लिपमध्ये आमदार वीज वितरण विभागातील इंजिनिअरला धमकी देत आहेत. मी बदली करुन घेईन असे इंजिनिअरने म्हटल्यावर, तू उत्तर प्रदेशमध्ये कुठेही जा, पण वाचू शकणार नाही असे ही आमदार धमकावत आहे. मुसलमानांच्या घरी छापेमारी करुन वीजचोरीची चौकशी करावी आणि त्यांच्यावर एफआयआर दाखल करावा अशी मागणी या क्लिपमध्ये आमदार गुप्तांकडून केली जात आहे.

आमदाराच्या मतदारसंघात वीजचोरीच्या संशयातून काही मोठ्या उद्योगपतींच्या येथे छापेमारी आणि ७ जणांवर एफआयआर दाखल झाल्यानंतर आमदाराने इंजिनिअरला फोन केला होता. त्यांच्यासोबत फोनवर झालेलं हे बोलणं इंजिनिअरने रेकॉर्ड केले. सध्या हा ऑडिओ सोशल मीडियावर व्हायरल होत असून भाजपा आमदाराच्या वादग्रस्त विधानावर टीका होत आहे.