दिग्गज कलावंत घडविणारे अभिनयाचे गुरु रोशन तनेजा यांचे निधन !
मुंबई: बॉलिवूडमधील अनेक दिग्गज कलाकारांना अभिनयाचे धडे देणारे गुरू रोशन तनेजा यांचे शुक्रवारी रात्री वयाच्या ८७ व्या वर्षी निधन झाले. त्यांच्या पार्थिवावर आज सांताक्रुझ येथील स्मशानभूमीत संध्याकाळी ४.३० वाजता अंत्यसंस्कार पार पडणार आहेत. त्यांच्या पश्चात त्यांची पत्नी मिथिका, मुलगा रोहित आणि राहुल असा परिवार आहे.
रोशन तनेजा यांनी बॉलिवूडमधील शबाना आझमी, नसीरुद्दीन शहा, जया बच्चन, अनिल कपूर व शत्रुघ्न सिन्हा यांसारख्या दिग्गज कलाकारांना अभिनयांचे धडे दिले होते. भारतात ते बॉलिवूडमधील अभिनयाचे बेसिक ज्ञान व पाया घडविणारे प्रणिते म्हणून ओळखले जायचे. १९६० सालापासून ते अभिनयाचे प्रशिक्षण देत आहेत. सुरूवातीला त्यांनी पुण्यातील एफटीआयआयमधून अभिनयाचे धडे द्यायला सुरूवात केली आणि नंतर त्यांनी मुंबईत खासगी रोशन तनेजा स्कुल ऑफ अॅक्टिंगची इन्स्टिट्युट सुरू केली.
अभिनेत्री शबाना आझमी यांनी त्यांना ट्विटवरून श्रद्धांजली वाहिली आहे. त्यांच्या निधनाबद्दल शबाना आझमी यांनी दु:ख व्यक्त केले आहे. अभिनेता राकेश बेदी यांनी माझ्यासाठी आजचा दिवस खूप वाईट आहे असे म्हटले आहे.