BREAKING:अजित पवारांचे ‘ते’ विधान दिशाभूल करणारे; शरद पवारांची ट्वीटद्वारे प्रतिक्रिया

मुंबई: काल शनिवारी मुख्यमंत्री देवेंद्र फडणवीस यांनी अजित पवार यांच्या पाठिंब्यावर शपथ घेतली. सोबतच उपमुख्यमंत्री म्हणून अजित पवारांनी शपथ घेतली. मात्र अजित पवारांनी पक्षविरोधी कारवाई केल्याचे उघड झाले आहे. सर्व आमदार राष्ट्रवादीतच आहेत. त्यांच्याकडील गटनेते पद देखील काढून घेण्यात आले आहे. कालपासून अजित पवार कोणाशीही संपर्कात नाही. आज अजित पवारांनी प्रथमच ट्वीटकरून आपले मत व्यक्त केले आहे. ट्वीटकरून भाजप आणि राष्ट्रवादी राज्याला स्थिर सरकार देणार असल्याचे सांगत मी राष्ट्रवादीतच असून शरद पवार साहेबांसोबत आहे असे वक्तव्य अजित पवारांनी केले आहे. त्यामुळे एकच खळबळ उडाली. दरम्यान आता शरद पवारांनी ट्वीट केले असून अजित पवार चुकीची आणि संभ्रम निर्माण करणारे वक्तव्य करत असल्याचे सांगितले आहे.

भाजपसोबत जाण्याचा प्रश्नच निर्माण होत नाही. मी शिवसेना आणि कॉंग्रेससोबत असून आम्ही भाजपला सभागृहात पराभूत करू असे सांगितले आहे.

जयंत पाटील यांनी देखील अजित पवारांच्या ट्वीटरला प्रत्युत्तर दिले आहे. आपण राष्ट्रवादी कॉंग्रेसचे संस्थापक सदस्य आहात. आदरणीय पवार साहेबांच्या सावलीत आपण सगळेच वाढलो आहोत. मात्र, राज्याच्या हितासाठी भाजपसोबत न जाण्याचा निर्णय साहेबांनी घेतला आहे. साहेबांच्या या निर्णयाचा आदर ठेवून आपण परत या असे आवाहन केले आहे.