BREAKING: घरकुल घोटाळ्यातील देवकर, आमदार सोनवणे यांच्यासह ३५ जणांना जामीन !

जळगाव: बहुचर्चित जळगाव घरकुल घोटाळ्याप्रकरणी तुरुंगात असलेले माजी मंत्री गुलाबराव देवकर, आमदार चंद्रकांत सोनवणे यांच्यासह ३५ जणांना आज शुक्रवारी औरंगाबाद खंडपीठाने जामीन मंजूर केले आहे. न्या.टी.व्ही.नलावडे, न्या.के.के.सोनवणे यांच्या खंडपीठासमोर कामकाज झाले. विधानसभा निवडणुकीच्या तोंडावर ही जामीन मंजूर झाल्याने मोठे राजकीय परिणाम दिसून येणार आहे.

धुळे कोर्टाने आरोपींनी दंडाची रक्कम भरून वरच्या कोर्टात अपील करण्याचे व जामीन मिळवण्याचे प्रयत्न सुरू केले होते. या आरोपींनी औरंगाबाद येथील उच्च न्यायालयाच्या खंडपीठात त्यासाठी केलेल्या अर्जानुसार आज त्यांना जामीन मंजूर करण्यात आला आहे. माजीमंत्री गुलाबराव देवकर तसेच आ.चंद्रकांत सोनवणे यांच्यासह शिक्षा झालेल्या सुमारे ४८ जणांनी जामिनासाठी अर्ज केले होते. यातील रुग्णालयात दाखल तसेच मुख्य आरोपी सुरेश जैन, राजेंद्र मयूर, जगन्नाथ वाणी, प्रदिप रायसोनी यांच्या जामिनावर नंतर कामकाज होणार आहे. दरम्यान, यापूर्वी जामीन अर्जावर दोनवेळा निर्णय पुढे ढकलण्यात आला होता. आज अखेर त्यावर निर्णय झाला असून त्यांना जामीन मंजूर करण्यात आला आहे.