BREAKING: बीड जिल्ह्यातील राष्ट्रवादीचे ‘हे’ असणार उमेदवार ; पवारांनी केली घोषणा !
बीड: राष्ट्रवादी काँग्रेस पक्षाचे प्रमुख शरद पवार यांनी आज बुधवारी बीड जिल्ह्यातील पदाधिकारी अन् कार्यकर्त्यांचा मेळावा घेतला. या मेळाव्यात पवारांनी बीडमधील काही उमेदवारांची घोषणा केली. राष्ट्रवादी काँग्रेसच्या विधानसभा उमेदवारांची पहिली यादी पवार यांनी जाहीर केली. त्यावेळी, उपस्थित कार्यकर्त्यांनीही या नावांची घोषणा होताच जल्लोष केला. शरद पवार यांनी बीड जिल्ह्यातील पाच संभाव्य उमेदवारांची घोषणा केली.
बीडमधील कार्यक्रमात बोलताना पवार यांनी मोदी सरकार आणि फडणवीस यांच्यावर टीकास्त्र सोडले. त्यानंतर, आगामी विधानसभा निवडणुकांसाठी तयार राहण्याचे आदेश कार्यकर्त्यांना दिले आहेत. तसेच, मी तरुणांच्या जोरावर मी ही निवडणूक लढवत आहे, असे म्हणत पवार यांनी राष्ट्रवादीच्या 5 उमेदवारांची घोषणा केली. विशेष म्हणजे पवार यांनी तरुण उमेदवारांना संधी दिल्याचे दिसून येत आहे. शरद पवार यांनी परळी विधानसभा मतदारसंघात धनंजय मुंडे यांना उमेदवारी दिल्याचे घोषित केले. तर गेवराई मतदारसंघातून विजयसिंह पंडित, केजमधून नमिता मुंदडा, बीडमधून संदीप क्षीरसागर आणि माजलगावमधून प्रकाश सोळंके असे पहिले पाच उमेदवार शरद पवार यांनी जाहीर केले. तर, जिल्ह्यातील एकमेव बाकी राहिलेल्या आष्टी या मतदारसंघातील उमेदवार लवकरच जाहीर करु, असेही पवारांनी सांगितले.