बुलंदशहर हिंसाचार प्रकरणी मुख्य आरोपीला अटक; आतापर्यंत ३२ जण अटकेत

बुलंदशहर-उत्तर प्रदेशातील बुलंदशहरमध्ये कथित गो-हत्येच्या संशयावरून एका पोलीस निरीक्षकाची हत्या करण्यात आली. या घटनेला आज एक महिना पूर्ण झाला आहे. दरम्यान हिंसाचारातील प्रमुख आरोपी योगेश राज याला अटक करण्यात आहे. हिंसाचारानंतर योगेश फरार होता. दरम्यान, स्याना हिंसाचार प्रकरणी दोन अल्पवयीन आरोपींही कोर्टात शरण आले. त्यानंतर दोन्ही आरोपींची कोर्टाने तुरुंगात रवानगी केली. या प्रकरणी आजवर १३ अल्पवयीन आणि ३२ आरोपींना अटक करण्यात आली आहे.

या हिंसाचारात पोलीस निरिक्षक सुबोधकुमार यांची गोळी घालून आणि डोक्यात कुऱ्हाडीचे घाव घालत हत्या करण्यात आली होती. तर यात सुमीत नामक तरुणाचा गोळी लागून मृत्यू झाला होता.

या प्रकरणी २७ अल्पवयीन आणि सुमारे ६० अज्ञात आरोपींविरोधात गुन्हा दाखल झाला होता. चांदपूर पुठी गावाचे रहिवासी सतीशकुमार आणि महाब येथील रहिवासी विनितकुमार हे बुधवारी कोर्टासमोर शरण आले.