सत्ताधारी नगरसेवकांचा मुख्याधिकार्‍यांवर भ्रष्टाचाराचा आरोप
चाळीसगाव पालिकेची सभा गाजली : नगरसेवक – मुख्याधिकार्‍यांमध्ये शाब्दीक चकमक
चाळीसगाव- येथील नगरपालीकेतील पाणी पुरवठा विभागातील विविध प्रकारच्या वॉल खरेदी व त्यांच्या वापराबाबत मोठ्या प्रमाणावर भ्रष्टाचार झाला आहे असा आरोप करून पालीकेच्या सत्ताधारी गटाचे नगरसेवक तथा भाजपा शहराध्यक्ष घृष्णेश्वर पाटील यांनी प्रचंड खळबळ उडवून दिली. आर्थिक घोटाळ्याच्या आरोपावरून सभागृहात चांगलेच तापले होते. तब्बल एक ते दीड तास यावर वादळी चर्चा झाली. या घोटाळ्याप्रकरणी चौकशी समिती नेमण्याची लेखी मागणी घृष्णेश्वर पाटील यांनी नगराध्यांक्षाकडे केली असता नगराध्यक्षा आशालता चव्हाण यांनी अशी समिती नेमण्याचा आपणाला अधिकार नसून याबाबत जिल्हाधिकार्‍यांकडे तक्रार करावी, तेच निर्णय घेऊ शकतील असे सांगितले. तर मुख्याधिकारी अनिकेतन मानोरकर यांनी आपण कुठलाही गैरव्यवहार केला नसून हायकोर्टाच्या आदेशाचे पालन केल्याचे सांगितले. या दोघांमध्ये झालेल्या शाब्दिक चकमकीने सुमारे दोन तास सभा गाजली
चाळीसगाव नगरपालीकेची विविध विषयांवर चर्चा करण्यासाठी आज मंगळवारी सकाळी ११ वाजता पालीकेच्या सभागृहात बैठक बोलावली होती. सभेत ३६ विषय मांडण्यात आले. सभेच्या अध्यक्षस्थानी नगराध्यक्षा आशालता चव्हाण होत्या. व्यासपीठावर उपनगराध्यक्षा आशाबाई चव्हाण, मुख्याधिकारी अनिकेत मानोरकर यांच्यासह सत्ताधारी व विरोधी गटाचे नगरसेवक उपस्थित होते. सभेच्या प्रारंभी उद्योजक हीमाभाई हिरूभाई पटेल व दिवंगत शहरवासियांना आदरांजली वाहण्यात आली. त्यानंतर सभेच्या कामाला सुरुवात झाली. सत्ताधारी नगरसेवक नितीन पाटील यांनी अध्यक्षांच्या परवानगीने लोकसभा निवडणूकीत विजयी झालेले उन्मेष पाटील यांच्या अभिनंदनाचा ठराव मंजूर करण्यात आला. त्यानंतर सत्ताधारी गटाचे नगरसेवक घृष्णेश्वर पाटील यांनी पाणी पुरवठा विभागातील वॉल खरेदीमध्ये मोठ्याप्रमाणावर भ्रष्टाचार झाल्याचा आरोप करून सभागृहात खळबळ उडवून दिली.नगरपालीकेला अशा व्हॉल खरेदीची गरज नसतांना तसेच प्रत्यक्षात अशी कुठलीही खरेदी झालेली नसतांना बोगस कामे दाखवून खोटे स्टॉक रजिस्टर हाताळण्यात आले आहे. यावरील सर्व नोंदी संशयास्पद असून त्याची चौकशी झाली पाहिजे. कोट्यावधी रूपयांची बीले संबंधीत ठेकेदाराला अदा केल्याचा गंभीर आरोप त्यांनी केला. ही सर्व बिले संबंधीत ठेकेदाराला देण्याबाबत मुख्याधिकारी अनिकेतन मानोरकर यांचा वैयक्तीक कल असल्याचा गंभीर ठपका ठेवत, तुम्ही भ्रष्टाचाराला खतपाणी घालत आहात आणि ठेकेदारांचे भले करून नागरीकांच्या पैशाचा अपव्यय करीत आहात असे एका पाठोपाठ एक आरोप केले. घृष्णेश्वर पाटील यांच्या या आरोपाने काही वेळ सभागृहात स्मशान शांतता पसरली. शहर विकास आघाडीचे राजीव देशमुख यांनी अशा प्रकारची अनियमीतता असेल तर मुख्याधिकार्‍यांनी लक्ष घालावे असे सांगितले. नगरसेवक राजेंद्र चौधरी यांनी मागील कुठलेही बिलांची रक्कम अदा करण्यापूर्वी ही बिले सभागृहासमोर ठेवावी अशी सुचना केली.
गैरव्यवहार केला नाही- मानोरकर
या गंभीर आरोपाबाबत मुख्याधिकारी अनिकेत मानोरकर यांनी स्पष्टीकरण मांडावे असे मत सदस्यांनी व्यक्त केले. त्यावर मुख्याधिकारी मानोरकर यांनी मी कुठल्याही प्रकारचा गैरव्यवहार केला नसून संबंधीत ठेकेदाराने आपले पैसे मिळावे म्हणून हायकोर्टात दाद मागितली होती.त्यामुळे न्यायालयाचे पालन करून बिले अदा केल्याचे सांगितले.तरी देखील सदस्यांना गैरव्यवहाराची शंका असल्यास त्यांनी माझ्या वरिष्ठांकडे तक्रार करावी असे सांगितले. चर्चेत अण्णा कोळी, सुरेश स्वार, रामचंद्र जाधव, सुर्यकांत ठाकूर, दीपक पाटील, नितीन पाटील,गटनेते संजय पाटील यांनी सहभाग घेतला. सत्ताधारी पक्षाच्याच नगरसेवकाने भ्रष्टाचाराचा आरोप केल्याने पालीकेच्या वर्तुळात चांगलीच खळबळ माजली आहे