कॉंग्रेसच्या ज्येष्ठ नेत्याचे मुलाविरोधात तक्रार

नागपूर: काँग्रेसचे माजी प्रदेशाध्यक्ष आणि ज्येष्ठ नेते रणजीत देशमुख यांनी स्वतःच्या मुलाविरोधात पोलिसात तक्रार दिली आहे. मुलगा डॉ.अमोल देशमुख बळजबरीने घरात राहात असल्याची तक्रार रणजीत देशमुख यांनी केली आहे. स्वतंत्र विदर्भाची मागणी सातत्याने लावून धरणारे काटोलचे भाजप आमदार आशिष देशमुख आणि अमोल देशमुख हे सख्खे भाऊ आहेत.

डॉ.अमोल देशमुख गेल्या काही महिन्यांपासून परवानगीशिवाय, माझ्या मालकीच्या सिव्हिल लाईन्स येथील घरात बळजबरीने राहत आहे, माझ्या संपत्तीतून दोन बंगले राहायला दिले आहे असे रणजीत देशमुख यांनी तक्रारीत म्हटले आहे.

रोज घरी येणारे त्याचे मित्र आणि कार्यकर्त्यांमुळे मला शारीरिक आणि मानसिक त्रास होत आहे, माझी प्रकृती ढासळत आहे, रक्तदाब वाढला आहे. हे त्रास थांबविण्याकरिता ४ मे रोजी मी माझ्या घराच्या दाराला दोन कुलूप लावले होते. मात्र, ५  मे रोजी डॉ अमोल देशमुखने ते दोन्ही कुलूप तोडून आत प्रवेश केला.

त्यामुळे मजबुरीने आता मी माझ्या घरासमोर ४  गार्ड्स/सुरक्षा रक्षक ठेवले आहेत. जर पोलिसांनी माझे घर रिकामे करुन दिले नाही, तर इथे काही अघटिक घडू शकते असा इशाराही देशमुख यांनी दिला आहे.